Tre – fornybart og berekraftig?

Tre bind karbondioksid (CO₂)

Hovudbestanddelen i tre, karbon, inngår i naturen sitt eige kretsløp. Når treet veks, tek det opp ${\mathrm{CO}}_2$ frå lufta. Dermed vil ${\mathrm{CO}}_2$ bli bunde opp i trevirket, både i det levande treet og i produkt vi lagar. Du kan lese meir om dette i artikkelen om fotosyntesen.

Meir bruk av tre vil bidra til å redusere ${\mathrm{CO}}_2$-tilførselen til atmosfæren. Bruk av tre er derfor eit klimavenleg alternativ som byggemateriale.

Når trea blir hogde, vil dei naturleg nok ikkje kunne ta opp meir ${\mathrm{CO}}_2$. Ny skog som blir planta, vil på sikt kompensere for dette. Men det tek mange år før ${\mathrm{CO}}_2$-opptaket frå skogen blir på same nivå igjen.

Miljøsertifisering av tre

Det aller meste av skogbruket i Noreg er underlagt standardar for berekraftig skogbruk. I desse standardane blir det mellom anna stilt krav til å gjennomføre miljøregistrering, rydde bekkar for hogstavfall og reparere køyreskadar i terrenget. Skogbruket skal ta omsyn til det biologiske mangfaldet.

PEFC (Programme for the Endorsement of Forest Certification schemes)

Dette er ei internasjonal merkeordning for tre- og papirprodukt som skal sikre berekraftig skogbruk. Det blir stilt ei rekkje krav til korleis hogsten blir gjennomført, for å kunne få bruke dette merket, mellom anna at ein skal

• kartleggje økologisk viktige område (nøkkelbiotopar)
• ta omsyn til spelplassar for storfugl og orrfugl
• setje att nokre store tre, tre langs bekker og nokre døde tre

I tillegg blir det stilt ei rekkje krav til korleis skogen skal skjøttast før han blir hogd.

FSC – Forest Stewardship Council

FSC er ei merkeordning som omfattar alle ledd i verdikjeda: skog, produsentar og ferdige produkt. For å kunne bruke dette merket blir det mellom anna stilt krav om å ikkje bruke tømmer frå

• ulovleg hogst
• skogar med høg verneverdi
• genmodifiserte tre
• produsentar som ikkje rettar seg etter "tradisjonelle rettar og borgarrettar"