Samanføyingsteknikkar i tre

I filmen under viser Knut Ivar Sørheim ulike samanføyings- og handverksteknikkar.

Å bruke trelim og spikar er den enklaste måten å samanføye tre på. Ved bruk av spikar er det viktig å felle ned spikarhovudet, slik at han ikkje stikk opp frå overflata.

Det er lurt å forbore, slik at treet ikkje sprekk når du skal skru i enden av ein planke. For å søkke skruehovudet kan du bruke drill. I filmen under lærer du korleis du kan bruke ein batteridrill til å setje inn skruar og til å bore.

Du kan bruke open gjennomgåande eller skjult plugg saman med trelim. Synlege pluggar kan brukast dekorativt.

Ved kryssfelling senkar du den eine planken i den andre ved å felle inn spor.

I ein fingerskøyt freser eller sagar du ut "fingrar" som passar i kvarandre, i enden av begge trestykka. Påfør lim før stykka blir pressa saman. Animasjonen under viser korleis skøyten fungerer.

Sinking

Sinking er ei form for fingerskøyt. Det er ei sterk samanføying du kan bruke når du skal setje heiltre saman i vinkel. Sambandet held trevirket stabilt. I filmen under demonstrerer Kjetil Sømoe korleis du kan lage gjennomgåande sinking med handverktøy.

Gjennomsink

Gjennomsink blir brukt til å setje saman skrog til skap eller liknande. Samanføyinga er synleg på begge sider og fungerer òg som dekorativt element.

Svalehale

Når tappane i samanføyinga har skrå sider, liknar forma på halen til ein svale. Teknikken blir derfor også kalla svalehale.

Fordekt sink

Fordekt sink blir brukt i skuffer og skapskrog der sinken er usynleg frå utsida. Den blir òg kalla skjult sink.

Når vi skal lime saman to trestykke, der treet har ulik retning, kan vi bruke ein tapp for å gjere samanføyinga solid. I filmen under viser Kjetil Sømoe korleis du kan lage tappsambinding med handverktøy.