Fag

Fagstoff

Video

Møbeltapetserar

Møbeltapetserarar jobbar med interiørsaum og stoppar og trekker møblar. Dei kan både restaurere og produsere møblar og interiørprodukt. Arbeidet er ofte spesialoppdrag som inneber mykje handarbeid, men også bruk av maskiner. Kundane er medvitne kring gjenbruk og kvalitet.

Film: Gammelt nytt på nett: møbeltapetserer

I filmen under (lengde 3.09) fortel møbeltapetserar Sofie Pocock om arbeidet sitt.

Video: Filmkonsulentene / CC BY-NC-ND 4.0

Varierte oppdrag

Møbeltapetserarar bygger opp underlag, stoppar, skjer til stoff eller skinn og trekker møblar. I dette arbeidet er det viktig med riktig bruk av materiale og teknikkar. Oppdraga kan variere frå mindre interiørprodukt til avanserte restaureringsprosjekt.

Møbeltapetserar stoppar ein lenestol. Foto.

Eigenskapar

Som møbeltapetserar bør du ha god form- og fargesans og kunnskapar om ulike materiale og stilartar. Fleksibilitet og nøyaktigheit er viktige eigenskapar.

Klipping av møbelstoff. Foto.

Utdanning

Fleire fag innan design og tradisjonshandverk har ikkje eit skuletilbod, men opplæring i bedrift etter Vg1. Desse faga kallast særløp. Møbeltapetserar er eitt av særløpa, der du går tre år i lære etter Vg1 handverk, design og produktutvikling. Fullført og bestått opplæring fører fram til sveinebrev. Yrkestittelen er møbeltapetserar.

Ein grå stol, eit teak-bord, ei kvit stålampe og ein gul sofa. Foto. — Ei redesigna sittegruppe er utstilt hos Eljest AS.