Straum, spenning, resistans og elektrisk effekt
Aktuelt bakgrunnsstoff: Effekt og Ohms lov – likestraum.
Førebuing
a) Sjå på sida "Effekt" nemnd ovanfor og skriv ned formelen for samanhengen mellom elektrisk effekt P, elektrisk straum I og elektrisk spenning U i ein straumkrins.
b) Sjå på sida "Ohms lov – likestraum" og skriv ned den formelen vi kallar Ohms lov. Forklar kva symbola står for.
Kor mange panelomnar på 1 000 W kan du kople på ein straumkurs der sikringa er på 16 A?
Gå på nettsidene til ein leverandør av kvitevarer (kvitevarer er hushaldsmaskinar som oppvaskmaskin, kjøleskap, komfyr og liknande). Finn ein litt kraftig støvsugar.
Kan denne støvsugaren koplast til ein stikkontakt som står i ein straumkurs som er sikra med 10 A sikring? Kor kraftig kan støvsugaren maksimalt vere?
Du vil lade opp ein elbil heime, men har ikkje nokon eigen elbilladar. Finn ut kva krav som gjeld for å lade elbil frå vanleg stikkontakt, og bruk desse krava til å finne ut kor lang tid det tek å lade opp eit heilt tomt elbilbatteri med kapasitet 80 kWh.
- Bruk dei to formlane du skreiv opp i starten. Finn ein formel for den elektriske effekten P i eit apparat når du kjenner resistansen R og straumen I gjennom apparatet.
- Finn ein formel for resistansen R i apparatet ved å snu på formelen i oppgåve a). Vis korleis du reknar deg fram til svaret.
- Finn ein formel for straumen I gjennom apparatet ved å snu på formelen i oppgåve a). Vis korleis du reknar deg fram til svaret.
- Bruk dei to formlane du skreiv opp i starten. Finn ein formel for den elektriske effekten P i eit apparat når du kjenner resistansen R og spenninga U over apparatet.
- Finn ein formel for resistansen R i apparatet ved å snu på formelen i oppgåve d). Vis korleis du reknar deg fram til svaret.
- Finn ein formel for spenninga U over apparatet ved å snu på formelen i oppgåve d). Vis korleis du reknar deg fram til svaret.
- Bruk resultatet i oppgåve d) til å finne resistansen i ein panelomn som har ein effekt på 1 000 W. Forklar kva du gjer for å komme fram til svaret.
- Du kan finne svaret i oppgåve g) direkte ved å bruke ein av formlane ovanfor. Bruk denne formelen til å rekne ut svaret i g).
- Lag ei oppgåve der du kan bruke formelen i oppgåve c) til å finne svaret. Løys oppgåva.