Budsjett for ein barnehage

Barnehagen Furefoss har 37 barn. For kvart barn får barnehagen tilskot frå staten. I tillegg betaler føresette barnehagekontingent og kostpengar. Barnehagekontingenten er månadsprisen for barnehageplassen, og kostpengane dekkjer maten som barnet får servert i barnehagen.

Bruk rekneark, og lag eit budsjett for Furefoss barnehage for januar. Budsjettet skal gi ei oversikt over samla inntekter, kostnader og resultat.

Inntekter: Tilskot frå staten per barn er 15 000 kr, barnehagekontingent per barn er 2 800 kr, og kostpengar per barn er 450 kr. Kostnader: Overtid per time er 370 kr, og barnehagen forventar 5 overtidstimar i januar. Utgifter til kurs blir forventa å bli 4 200 kr, transport 1 400 kr, lønn 620 000 kr, reingjering 7 680 kr, husleige 8 300 kr, administrasjonskostnader 2 300 kr, mat 18 000 kr og utgifter til materiell 3 200 kr.

Bruk rekneark, og lag eit budsjett for Furefoss barnehage for februar.

Barnehagen får to nye barn. I budsjettet for februar må talet på barn aukast frå 37 til 39. Utgifter til mat aukar til 19 000 kr. To av avdelingane skal på ein lang busstur, og transportkostnadene blir auka til 5 600 kr. Talet på overtidstimar aukar òg på grunn av bussturen, og det blir forventa 12 timar overtid i februar. Kostnader til kurs blir 1 100 kr, og utgifter til materiell blir 4 600 kr. Dei andre postane blir verande som i januar.

Reflekter over kva inntekter og kostnader som påverkar resultatet mest. Kvifor er det så stor differanse mellom resultata for januar og februar i budsjettet til Furefoss barnehage?

Under ser du rekneskapen for februar.

Når du gjennomfører budsjettkontroll, samanliknar du budsjett og rekneskap. Det er vanleg å leggje til ein kolonne med avvik, altså tal som viser differansen mellom forventa resultat (budsjett) og faktisk resultat (rekneskap). Avvika blir viste i prosent.

Kvar finn vi avvika, og kva kan dei kome av? Nemn nokre moglege årsaker. Kva konsekvensar kan dette ha for neste budsjett?