Kabelkrøll

Rekn ut kor mange lengder på 20 cm det blir på den aktuelle lengda. Hugs å ta omsyn til at dei ytste stiftane byrjar 5 cm frå endane.

Vi tek det stegvis.

Først trekkjer vi frå endestykka der det ikkje skal vere stift.

$300 \mathrm{cm}-2·5 \mathrm{cm}=290 \mathrm{cm}$

Så må vi finne ut kor mange lengder på 20 cm vi får på denne lengda.

$\frac{290 \mathrm{cm}}{20 \mathrm{cm}}=14,5$

Det blir altså 14,5 lengder på 20 cm. Det betyr at dersom vi slår inn stiftar med 20 cm mellomrom og har slått inn den nest siste stiften, er det att ei halv 20-cm-lengde, altså 10 cm, til den siste stiften.

Vi har altså totalt 15 lengder, sjølv om den siste lengda berre er halv når vi krev at det skal vere 20 cm mellom stiftane. Med kravet om lik avstand mellom stiftane, set vi dei derfor litt tettare slik at alle lengdene blir like lange, og vi veit då at avstanden mellom stiftane i alle fall ikkje blir over 20 cm. Det er fordi den siste lengda på 10 cm vil få lengde av dei andre 14.

Avstanden mellom stiftane blir då

$\frac{290 \mathrm{cm}}{15}=19,33 \mathrm{cm}$

Sidan det blir 15 lengder og det skal vere stift både i starten av første lengde og på slutten av siste lengde, treng vi éin stift meir enn talet på lengder. Vi treng altså 16 stiftar.

Her kan du få bruk for operatorane // og/eller %. Vi bruker tala 290 og 20 som eksempel. Vi har frå utrekninga over at 290 : 20 = 14,5.

// er heiltalsdivisjon, som betyr at 290 // 20 gir 14 som svar (desimalane blir tekne bort). Dette tilsvarer dei 14 "heile" lengdene på 20 cm frå utrekninga tidlegare i oppgåva.

% gir divisjonsresten, som betyr at 290 % 20 gir 10 som svar. Det er fordi at dersom vi reknar ut 290 : 20 for hand på papiret, vil vi ende opp med resten 10:

$\begin{array}{ccccccccccc}& 2& 9& 0& :& 2& 0& =& 1& 4& \\ & 2& 0& & & & & & & & \\ & & 9& 0& & & & & & & \\ & & 8& 0& & & & & & & \\ & & \mathbf{1}& \mathbf{0}& & & & & & & \end{array}$

Merk at dette er heilt i tråd med at det var att 10 cm til den siste lengda.