Oppgåve

Anbod på oppsetjing av ein vegg i bindingsverk

Kor mykje skal du som tømrar ta betalt for å setje opp ein vegg?

Denne sida er arkivert. Innhaldet kan vere utdatert.

Denne artikkelen er i eit fag som følgjer ein utgått læreplan. Versjonen du ser på, kan innehalde utdatert informasjon eller ha andre feil.

Standarar, sviller og losholtar i bindingsverksvegg. Illustrasjon. — Standarar, sviller og losholtar i bindingsverksvegg.

Du er tømrar og er med på ein anbodskonkurranse der du skal gi pris på å setje opp ein vegg i bindingsverk. Måla på veggen og andre detaljar finn du på sida "Å byggje vegg i bindingsverk".

Relatert innhald

Å byggje vegg i bindingsverk

De skal byggje ein vegg i bindingsverk på verkstaden. To personar jobbar fint saman om denne oppgåva.

Vegg i bindingsverk

Instruksjon om å byggje ein vegg i bindingsverk

Oppgåve 1

Det skal monterast skråavstiving på den lengste delen av veggen, sjå filmen på sida "Å byggje vegg i bindingsverk". Kor lang blir skråavstivinga?

Tips til oppgåva

Bruk pytagorassetninga.

Løysingsforslag

Den lengste veggen har måla 2 500 mm bortover og 2 400 mm oppover. Skråavstivinga blir derfor hypotenusen i ein rettvinkla trekant med sider 2 500 og 2 400 mm. Lengda på skråavstivinga blir

$\sqrt{2 500^{2} + 2 400^{2}} mm = 3 466 mm$

Oppgåve 2

Du skal bruke eit rekneark til å rekne ut anbodsprisen på veggen. Du bruker avansemetoden til å rekne ut prisen. Vi tek ikkje med kostnader til festemateriell som spiker og skruar i første omgang.

Kva skal/bør inndataområdet i reknearket innehalde?

Løysingsforslag

Inndataområdet i reknearket skal innehalde

dimensjonane på veggen
meterprisen på dei ulike trematerialane
ein prosentsats for svinn/kapp
timeprisen for tømrararbeid
satsen for meirverdiavgift
avansen i prosent

Oppgåve 3

Lag eit rekneark der du reknar på kor mykje du skal ta for å setje opp veggen. Reknearket skal innehalde

utrekning av materialforbruk inkludert svinn/kapp
kostnadene for sjølve arbeidet (vi går ut ifrå at det er 7 timars arbeid å setje opp denne veggen)
sum kostnader
75 prosent avanse
pris utan meirverdiavgift
utrekning av meirverdiavgifta
pris med meirverdiavgift = anbodspris

Til skråavstivinga blir dimensjonen 16 x 98 mm brukt. Finn meterprisar på materialane på nettet. Alternativt kan du bruke at skråavstivinga kostar 12 kr/m, og at standarverket kostar 19 kr/m. Det kan vere lurt å rekne om materialprisane til kroner per mm. (Kvifor?)

Lag ditt eige rekneark, eller bruk oppsettet i reknearket nedanfor. I dette reknearket skal du fylle ut dei gule felta med reknearkformlar eller tal.

Mal for rekneark(XLSX)

Fasit

Anbodsprisen blir 11 010,98 kroner inkludert meirverdiavgift. Sjå ferdig utfylt rekneark lengst ned på sida.

Oppgåve 4

Kva blir den gjennomsnittlege prisen per kvadratmeter ferdig oppsett vegg?

Oppgåve 5

Bruk resultatet i den førre oppgåva til raskt å finne ut kva du skal ta for å setje opp bindingsverksveggen (utan tak og golv) til ei bu som måler 3 x 6 meter?

Oppgåve 6

Tømrarlønna går opp med 5 prosent. Korleis påverkar det anbodet i oppgåve 3 og den gjennomsnittlege prisen per kvadratmeter i oppgåve 4?

Oppgåve 7

Prisen på trelast går opp 15 prosent. Korleis påverkar det anbodet i oppgåve 3 og den gjennomsnittlege prisen per kvadratmeter i oppgåve 4?

Oppgåve 8

Nemn andre ting som kan påverke prisen på anbodet.

Oppgåve 9

Kva må avansen vere for at anbodsprisen i oppgåve 3 blir omtrent 12 270 kroner inkludert meirverdiavgift?

Oppgåve 10

Gjer eit anslag på kor mange skruar du treng til veggen i oppgåve 3. Finn prisen på skruar, legg dette inn i reknearket, og finn ut om du bør ta med skruane i anbodsprisen.

Anbod på oppsetjing av bindingsverksvegg(XLSX)