Påslagskalkyle

Farek jobbar som servitør på ein stor kafé som sel enkle lunsjrettar og kaffi. Dei har òg utsal av diverse drikkevarer. Farek skal berekne salsprisen på mineralvatn og vel å bruke påslagskalkyle.

Kafeen sel mange ulike drikkevarer. Ved å bruke påslagskalkyle sparer Farek mykje tid, sidan dette er den aller enklaste måten å berekne salspris på.

Det mest krevjande med påslagskalkyle er å finne riktig påslagstal. Påslagstalet er det talet Farek skal gonge inntakskosten for produktet med for å finne salsprisen med meirverdiavgift.

Krev erfaringstal

Før Farek byrja å bruke påslagskalkyle, brukte han sjølvkostkalkyle. Etter kvart såg han at salsprisen han kom fram til for drikkevarene, som oftast var akkurat dobbelt så høg som inntakskosten. Derfor kunne han byrje å bruke påslagskalkyle med påslagstalet 2.

Døme

Farek har ein inntakskost på ei flaske mineralvatn på 10 kroner. Han gongar det med 2, og finn då at salsprisen med meirverdiavgift blir 20 kroner.