Marknadsmål for ein leverandør av mobiltenester

Marknadsmål er dei måla ei bedrift set for marknadsføringa, og poenget med å setje slike mål er at bedrifta skal ha noko å strekkje seg etter.

Her skal du formulere nokre marknadsmål for ei oppdikta bedrift som tilbyr mobiltenester. Bruk fantasien, og lag eigne føresetnader.

Inntektsmål

• Finn tal for omsetning og overskot for leverandørar av mobiltenester i Noreg. Deretter set du eigne marknadsmål for kor stor omsetninga til bedrifta di skal vere, og kor stort overskot du vil ha.
• Grunngi målet ditt.

Marknadsdel

Her dreier det seg om å slåst om dei kundane som allereie bruker mobiltelefon.

• Kor stor del av marknaden skal du ta? Skal du bli ein gigant som Telenor, eller nøyer du deg med å vere ein liten utfordrar som OneCall?
• Finn fram til tal for marknadsdelar i marknaden i dag, og formuler di eiga målsetjing.
• Grunngi målet ditt.

Nye kundar

Du kan òg setje deg mål for kor fort du ønskjer at marknaden din skal vekse. Her gjeld det å få endå fleire til å byrje å bruke mobiltelefon – altså skaffe nye kundar som ikkje bruker mobil i dag.

• Kor mange nye kundar trur du det er realistisk å kunne få? Kven er det som ikkje har mobil i dag?
• Grunngi målet ditt.

Kundetilfredsheit

Tilfredse kundar er lojale kundar.

• Søk deg fram til informasjon om kundetilfredsheita hos dei eksisterande leverandørane av mobiltenester.
• Kor fornøgde skal kundane dine vere? Kor viktig er det for deg at dei faktisk er fornøgde? Og kor fornøgde er kundane med konkurrentane – kanskje kan du bli betre enn dei?
• Grunngi målet ditt.

Kundelojalitet

Det er dyrt å skaffe seg nye kundar, og det kan derfor vere lønsamt å ha kundar som er lojale.

• Kor lojale kundar ønskjer du?
• Er det viktig for deg at ein kunde som har handla hos deg, kjem tilbake til deg neste gong, eller er det greitt at han går til konkurrenten?
• Grunngi svaret ditt.