Handsaum

Attersting gir ein sterk og elastisk saum og blir brukt på same måte som rett symaskinsaum.

Faldesting blir òg kalla loresting. Det bruker du til å sy oppbrett på eit plagg slik at stinga ikkje blir viste frå rettsida av plagget.

Vi bruker fellesting til å sy ned ein klippekant og sikre at han ikkje raknar.

Som namnet seier, blir forsting brukt til å feste for, men det kan òg brukast til andre saumar som ikkje treng å vere sterke.

Heksesting blir òg kalla kryssesting. Vi bruker denne saumteknikken til å halde to lag saman eller til å sikre at ein kant ikkje raknar.

Kastesting eller overkasting blir brukt for å sikre at klippekanten ikkje raknar.

Prikkesting blir brukt til å sy stikningar frå rettsida av stoffet. Du kan gjere saumen nesten usynleg, eller du kan bruke prikkane dekorativt.

Regels fungerer som ein knutekant. Han blir brukt til å forsterke stoffet der det kan bli stor belastning på plagget.

Her kan du repetere prikkesting.

Staffering er små sidesting. Dei blir brukte til å feste ein bretta kant til stoffet under. Du kan gjere stinga nesten usynlege eller bruke dei til dekorative tverrstriper.

Stikning blir brukt når vi skal sy gjennom tjukke stofflag.

Stossing er ein saumteknikk vi kan bruke når vi skal lage ein usynleg saum frå rettsida av stoffet.