Undervisningsopplegg i restitusjonsyoga
Restitusjonsyoga er, med sine sitjande og liggjande stillingar, ei roleg form for yoga. Målet med økta er å oppnå ei god avspenning i heile kroppen, både i hovudet og i muskulaturen.
Yoga passar alle
Yoga er ein aktivitet som passar alle uansett treningsgrunnlag og erfaring. Finn ein versjon av stillingane i denne yogaøkta som passar kroppen din. Nokre er stive, andre er mindre stive. Du vil kanskje òg oppleve at du er stivare i nokre ledd enn i andre, og kanskje det til og med er forskjell på den høgre og venstre sida av kroppen din? Dette er heilt normalt. Dersom du er veldig stiv, er yoga ei fin aktivitetsform for å auke rørsleevna.
Lande i stillinga
Når du skal gjere denne økta, er det viktig at du prøver å lande i stillingane. Det betyr at når du har funne ein variant av stillinga som passar kroppen din, skal du slå deg til ro i denne varianten utan å flytte på deg. Finn ein variant der du kan bli ei stund, der du klarer å puste utan å gjere deg umak, men der du likevel kjenner at det tøyer passe mykje.
Dei psykiske eigenskapane konsentrasjon og spenningsregulering er minst like viktige som dei fysiske eigenskapane rørsleevne og styrke i yoga. I denne økta skal du konsentrere deg om deg sjølv ved å setje pusten din og øvinga du skal gjere, i fokus. Ein medviten pusteteknikk vil gi deg ei god avspenning, hjelpe deg gjennom øvinga og kan mellom anna gjere deg betre til å meistre stress, om du jobbar med det over tid.
Å ha det bra med seg sjølv psykisk, eller å vere i balanse, som ein seier på yogaspråket, er ein viktig del av det å ha god helse. Det er god helsegevinst i å klare å slappe av og å meistre stress. I ein travel kvardag med tett program treng kroppen – spesielt hovudet – å kvile utan stimuli for å slappe ordentleg av. Å lese, høyre på musikk, bruke pc eller smarttelefon er aktivitetar som krev stimuli. Du kan trene på å slappe av ved å trene på konsentrasjonen og berre tenke på pusten, noko du skal gjere i denne yogaøkta. Du treng ikkje å tenke på kva du skal gjere seinare i dag eller i morgon, eller på innleveringar og prøvar. Du treng heller ikkje å tenke på det du gjorde i går. Prøv i staden å konsentrere deg om det du skal gjere her og no.