Fagartikkel
Kontrollrom
Sjølv om prosessen er automatisert, må vi ha menneske i fabrikken. Ei av dei viktigaste oppgåvene til ein prosessoperatør er å styre og overvake prosessen. Dette blir som oftast gjort frå eit kontrollrom.
Kontrollrom i ein fabrikk. Bilete: Steag / CC BY-SA 4.0
I somme fabrikkar er det fleire små kontrollrom plasserte rundt omkring i prosessen, andre fabrikkar har eitt stort, sentralt plassert kontrollrom. Av og til er det ein kombinasjon òg: eitt stort hovudkontrollrom og fleire mindre kontrollrom i same fabrikk.
I gamle dagar var kontrollromma store rom, med metervis av instrument plasserte langs veggane. Det finst framleis nokre slike fabrikkar, men i dag har ein som oftast mindre kontrollrom der alt blir styrt frå datamaskinar.
Eit kontrollrom er eit rom som fungerer som operasjonssentral i ein fabrikk. Frå dette rommet blir prosessen styrt og overvaka av prosessoperatørar.