Det fleirkulturelle Noreg

Noreg har etter kvart vorte eit fleirkulturelt samfunn, samansett av menneske frå ei rekkje ulike kulturar. Nokre flyttar hit for å studere, jobbe eller gifte seg, mens andre har opplevd krig, svolt, fangenskap eller det å vere på flukt.

Ved å bruke Statistisk sentralbyrå (SSB) og Utlendingsdirektoratet (UDI) sine nettsider om innvandring vil du heile tida kunne halde deg oppdatert på ei rekkje fakta om innvandring til Noreg.

Sjølv om det finst ein offisiell definisjon på kva ein innvandrar er, så dekkjer han likevel ikkje den røyndommen som mange innvandrarar opplever i kvardagen sin. Nokre kjenneteikn ser ut til å vere sterkare knytte til innvandraromgrepet enn andre. Dette gjeld til dømes:

• hudfarge
• namnetradisjonar
• språkdugleikar
• klesdrakt
• mattradisjonar

Eit land kan velje å handsame minoritetar/innvandrarar på ulike måtar. Det er vanleg å dele dei inn i tre hovudmåtar:

• Integrering
  Tilpassing - å bli ein del av det nye samfunnet samtidig som ein tek vare på og held ved like den opprinnelege kulturen sin. Dei som er i mindretal, har same rettar og plikter som resten av innbyggjarane. Dette er norsk politikk overfor minoritetar. Barnehage og skule er viktige arenaer for å få til god integrering.
• Segregering
  Åtskiljing - å leve åtskilt frå andre kulturelle grupper i samfunnet, som minoritet. Minoritetsgruppa har vanlegvis lite kontakt med hovudkulturen. Segregeringa kan vere tvungen eller frivillig.
• Assimilering
  Å bli lik - som majoriteten i det samfunnet ein kjem til. Kulturen til minoriteten vert borte eller meir lik hovudkulturen.

For den enkelte kan det vere viktig at vi bruker dei rette definisjonane, men det viktigaste for deg som fagarbeidar er at du møter alle menneske med respekt, openheit og interesse. Som profesjonell yrkesutøvar er jobben din å gje brukarar/kundar eit tilbod som dekkjer dei behova dei har, uavhengig av kulturbakgrunn.