Samisk kultur som reisemål
Samisk kultur i reiselivsopplevingar
All kultur er i stadig endring, òg den samiske. Av over 50 000 samar i Noreg er vel 20 000 personar innskrivne i manntalet til Sametinget, og av desse bur flest i Tromsø kommune. Sjølv om mange samar bur i byar, er natur og kulturarven sjølve kjernen i det samiske reiselivsproduktet. Filmen over er eit godt døme på dette.
Film: Samisk kultur som reisemål
På Mollisjok Fjellstue og Lodge inviterer dei turistar inn i ei reiselivsoppleving på premissane til naturen på vidda, med ryper, fisk og rein. Sjå filmen nedanfor (lengde 06:14).
Diskuter
Kva for nokre konkrete reiselivsopplevingar blir presenterte i filmen?
Kven vil de seie er målgruppa for denne typen reiselivsoppleving?
På kva måte kan ein seie at dette er ei berekraftig reiselivsoppleving?
Reflekter over korleis den samiske kulturarven blir halden i hevd.
Forklar kva som er meint med at opplevinga ikkje må disneyfiserast.
Kom med forslag til korleis dette tilbodet kan utvidast slik at det kan bli attraktivt for fleire målgrupper.
Gjer greie for korleis naturopplevinga er ein del av tilbodet.
Kva inntrykk og ferieminne trur de turistane sit att med etter ei slik reiselivsoppleving?
Kva trur de vertskapet ønskjer at turistane skal ta med seg heim av kunnskap og opplevingar etter eit opphald saman med dei?
Har de forslag til endringar? Grunngi.
På kva måte oppfyller denne reiselivsopplevinga krava om omsyn og etikk i utviklinga av samisk reiseliv?
Er dette ei oppleving de kunne tenkje dykk å vere med på? Kvifor? Eller kvifor ikkje?
Samisk kulturarv
Sápmi er nemninga på det historiske busetjingsområdet til samane. Det består av dei nordlege delane av Noreg, Sverige, Finland og Russland. Den samiske kulturen er mangfaldig, med ulike språklege og kulturelle variasjonar. Felles er det sterke sambandet mellom mennesket og naturen.
Når vi snakkar om samisk kultur, tenker vi ofte på den tradisjonelle kulturen med
- reindrift
- samisk språk og joik
- samiske klede og sko
duodji, samisk brukskunst
- samisk mat
- Sametinget
den samiske nasjonaldagen (6. februar)
samisk flagg
Samane lever moderne liv i Sápmi i dag, men det betyr ikkje at dei har gløymt kvar dei kjem frå, eller kven dei er. Kulturarven kjem til syne òg gjennom moderne kulturuttrykk – i alt frå musikk til kunst og nyskapande design.
Den tradisjonelle joiken blir gjord meir kjend og tilgjengeleg gjennom artistar som Ella Marie Hætta Isaksen og Ida Marie i Stjernekamp, og rapartistar som SlinCraze.
Festivalen Riddu Riđđu, den internasjonale urfolksfestivalen som kvart år blir arrangert i Kåfjord i Nord-Troms, bidreg òg til å skape medvit og stoltheit rundt det samiske.
Utvikling av det samiske reiselivet – organisering
Sametinget og reiseliv
Sametinget definerer det samiske reiselivet som "reiseliv der samiske kulturelementer utgjør hovedelementet i virksomheten". I utviklinga av samiske reiselivsbedrifter og reiselivsopplevingar er det derfor viktig at den samiske kulturen blir formidla på ein måte som samane sjølve kjenner seg igjen i. Sametinget har støtteordningar som skal stimulere til etablering av fleire samiske heilårs reiselivsbedrifter.
Johtit
Johtit er eit nettverk av samiske opplevingsbedrifter, leidd av NordNorsk Reiseliv. Både den sjøsamiske og den reindriftssamiske kulturen er representert, i tillegg til eit mangfald av samiske språk med både sør- og nordsamisk og lulesamisk. Reiselivsbedriftene i nettverket tilbyr varierte opplevingar, overnatting, samiske måltid, kunst og kulturtradisjonar.
Norske Samers Riksforbund (NSR)
NSR er den største samiske organisasjonen i Noreg. Det er ei samanslutning av ulike sameforeiningar. NSR er representert på Sametinget og jobbar lokalt, allsamisk og internasjonalt for å styrke det samiske samfunnet og for å fremme samisk kultur. Dei jobbar mellom anna for å utvikle nye samiske reiselivsbedrifter og sjå til at det samiske reiselivet blir basert på autentisk samisk kultur.
Reiselivsbedrifter som formidlar samisk kultur – døme
Film: Samisk reiseliv
Samipath er ein familiedriven reiselivsaktør i Karasjok som tilbyr eit breitt spekter av aktivitetar heile året. Her kan du oppleve det fantastiske landskapet rundt Karasjok og lære om samisk kultur. Sjå filmen nedanfor (lengde: 01:37)
Mollisjok Fjellstue og Lodge
Mollisjok tilbyr ulike aktivitetar med utgangspunkt i den samiske kulturen. Du kan mellom anna vere med på vårflyttinga av rein frå Mollisjok til Snefjord, der du undervegs på den 230 km lange reisa bur i tradisjonelle lavvoar, fiskar og et lokal samisk mat.
Sámi Safari Camp
Sámi Safari Camp er ein lavvoglamping med open eld, bjørkeris og reinsdyrskinn på golvet. Denne samiske reiselivsbedrifta er bygd opp rundt det åndelege språket til samane – forteljingar og ritual. Gjestene får eit innblikk i korleis naturen står i sentrum for dei åndelege tradisjonane til samane.
Davvi Siida
Davvi Siida tilbyr reiselivsopplevingar i form av samiske matopplevingar, duodji (tradisjonelt samisk handverk) og historieforteljingar. Naturen er kulturen deira, og som gjest kan vi få ta del i livet og kulturarven deira.