Konkurransemiddel

Produkt

Produktet må løyse eit behov du anten har identifisert eller skapt hos målgruppa. Det er ofte fleire som tilbyr relevante produkt, og då er det viktig å skilje seg ut. Fint design og gode verdiar som speler på ulike følelsar, kan bidra til at kundane legg merke til akkurat ditt produkt. Den fysiske innpakkinga, i form av kvalitet, utforming og emballasje, gir produktet ein visuell identitet.

Pris

Kva for prisstrategi skal du velje? Du bør ha eit tydeleg og medvite forhold til pris. Vil du ha ein høg pris for å signalisere eksklusivitet? Eller ønskjer du å tiltrekkje deg kundar med ein låg pris? Dersom du legg deg på ein middels pris, er det vanskelegare å bruke prisen som eit verkemiddel for å byggje merkevare.

Plassering (distribusjon)

Plassering handlar både om fysisk plassering og distribusjonsmetode. Ei sentral plassering, til dømes på Karl Johan i Oslo, er kostbar, men kan vere svært verdifull for å gjere merkevara kjend. For selskap som Amazon er distribusjonskanalen på nett ein svært stor del av merkevara.

Personale

Merkevarer er bygde opp rundt ein ideologi, og denne må personalet få opplæring i. Kundeopplevinga personalet gir, må høyre saman med ein heilskapleg kommunikasjon av merkevara. Ved å skape gode kunderelasjonar og få fornøgde kundar, kan personalet bidra til lojalitet til merkevara.

Påverknad (marknadskommunikasjon)

Vi bruker både produkt, pris, plassering og personalet aktivt når vi skal påverke målgruppa til å kjøpe ei merkevare. Vi må setje saman ein heilskapleg kommunikasjonsstrategi for påverknad, som gjer at kundane forstår konseptet vårt. Her er val av uttrykksform og kanalar for påverknad viktig.