Utforsk kontekst i kommunikasjonen

Del 1: Få grep på omgrepa

Les artikkelen om kontekst i kommunikasjonen, og lag ei visuell framstilling av omgrepa og korleis står til kvarandre.

Du kan ta utgangspunkt i ein kommunikasjonsmodell du kjenner til og bygge vidare på denne.

Bruk papir og blyant.

Del 2: Utforsk den tekstuelle konteksten

Finn fem korte utdrag med tekst som du kopierer og skriv ned på eit dokument. Her er nokre forslag der du kan hente utdraget frå:

• eit innlegg i sosiale medium
• ein annonse på Finn.no
• ei melding du har skrive til nokon
• ei lærebok

1. Gå saman i par. Les utdraga for kvarandre utan å seie kvar dei kjem frå.
2. Diskuter: Kor lett er det å forstå kva tekstutdraga handlar om?
3. Den meininga de får ut av utdraget kan seiast å kome berre frå den tekstuelle konteksten. Diskuter: Kva er det i den tekstuelle konteksten som gir dykk hint om kva slags meining de skal tilskrive ytringane?

Del 3: Utforsk den situasjonsmessige konteksten

Gjer oppgåvene i par eller små grupper:

Kor mange ulike kommunikasjonssituasjonar kan de kome opp med for desse ytringane?

• "Volvo 240, 1994-modell"
• "..."
• "Ingen har elska deg ømmare enn eg."

Diskuter: Kva faktorar i situasjonen er nødvendige å vite noko om for at ytringane skal få meining?

Del 4: Utforsk kulturkonteksten

I biletet under er teikneseriefiguren Pepe the frog brukt i ein reklameplakat for ferievillaer på Bali. Denne figuren har blitt eit meme, og har fått ei anna kulturelt tilskrive meining i enkelte nettkulturar.

• Undersøk fenomenet Pepe the frog, og finn ut kva slags ulike betydingar dette teiknet kan ha i ulike kulturkontekstar.
• Diskuter: Kva faktorar i kulturkonteksten er det nødvendig å vite noko om for at teikna skal få meining?

Del 5: Har du lært noko nytt om kontekst?

Gå tilbake til den visuelle framstillinga du laga i oppgåve 1. Er det noko du vil endre på etter å ha utforska kontekstomgrepet litt grundigare?