Marknadsaktivitetar

Marknadsaktivitetar er ei fellesnemning for alle aktivitetar som bedrifter gjennomfører innanfor ein tidsperiode for å fremje sal og vekst i bedrifta. Alle marknadsaktivitetar gjennom året blir beskrive i marknadsplanen til ei bedrift, som er ein slags aktivitetsplan. Ein slik plan beskriv kva som skal gjerast, kven som er ansvarleg og når aktivitetane skal gjennomførast.

Ein marknadsplan strekkjer seg vanlegvis over tolv månader og følgjer som regel kalenderåret. Marknadsplanen er ein del av marknadsstrategien til bedrifta, som gjerne blir utarbeidd for ein periode på tre til fem år.

Når du skal planleggje marknadsaktivitetar, bør du tenkje på å variere aktivitetane slik at du når alle i målgruppa di. Det er òg viktig at aktivitetane er målretta og passar i bransjen din.

Somme aktivitetar fungerer så godt at dei blir ein årleg tradisjon som både kundar og tilsette gler seg til. Dette kan vere ulike salsmesser i inn- og utland eller tilstellingar som til dømes den årlege hagefesten til Aschehoug forlag.

Kurs, konferansar og seminar er òg former for marknadsaktivitetar der ein kan invitere både tilsette og eksisterande og potensielle kundar. Slike store marknadsaktivitetar krev mykje planlegging og kostar gjerne mykje pengar, så derfor må ein vurdere nytteverdien nøye.