Tverrfagleg heildagsprøve – Hotel Union Øye
På Øye i enden av Norangsfjorden ligg eit av Europas mest herskapelege hotell. Hotel Union Øye har i generasjonar vore eit attraktivt reisemål for kongelege, forfattarar og andre. Heilt sidan opninga i 1891 har hotellet vore ein stad der gjestane kjem for å nyte stille, ro og det gode livet i storslegne omgivnader. Å bu på Hotel Union Øye er som å gå tilbake i tid.
Herskapeleg
Hotellet har tretti rom som alle er individuelt dekorerte og møblerte med nøye utvalde antikvitetar. Romma er kalla opp etter kjende personar som har budd på hotellet gjennom tidene: keisar Wilhelm II, kong Oscar II, dronning Maud og kong Haakon, forfattarane Karen Blixen, Knut Hamsun og sir Arthur Conan Doyle og ikkje minst komponisten Edvard Grieg.
Dei tre etasjane i hotellet er som eit levande museum. Kvar dag får besøkjande høve til å sjå inn på ledige hotellrom. Spaser ein tur i gangane og drøym deg tilbake i tid.
- budsjettkontroll
- berekraft og marknadsføring
- rekruttering
Hotel Union Øye førebur seg no til sommarsesongen. Du er tilsett på hotellet. Leiinga meiner at du, med utdanninga di, har kompetanse nok til å vere med og utforme drifta og strategiane til hotellet på ulike nivå.
1. Leiinga ønskjer at du skal utføre ein budsjettkontroll og kommentere avvika. (Tala er oppdikta.)
Omsetning | Budsjett 20xx | Rekneskap 20xx |
|---|---|---|
Losjisal | 7 500 000 | 7 000 000 |
Varesal | 4 500 000 | 5 422 000 |
Total omsetning | 12 000 000 | 12 422 000 |
Varekostnad | 2 250 000 | 2 950 000 |
Bruttoforteneste | 9 750 000 | 9 472 000 |
Personalkostnad | 4 700 000 | 5 336 000 |
Andre faste kostnader | 2 800 000 | 2 585 000 |
Sum faste kostnader | 7 500 000 | 7 921 000 |
Resultat | 2 250 000 | 1 551 000 |
- Rekn ut og kommenter avvika mellom budsjettet og rekneskapen.
- 85 prosent av varekostnadene er knytte til varesalet og dei resterande til losjisalet. Berekn bruttoforteneste for høvesvis varesal og losjisal i kroner og i prosent.
- Kva type sal gir den beste lønnsemda for hotellet?
2. Hotellet ønskjer å bli meir berekraftig. Dagleg leiar ber deg derfor undersøkje korleis andre hotell profilerer seg som berekraftige. Lag ein Powerpoint-presentasjon der du presenterer funna dine.
3. Med bakgrunn i omgrepet berekraftig reiseliv skal du komme med forslag til aktivitetar/produkt som Hotel Union Øye kan tilby gjestane sine i sommarsesongen. Ta med ei vurdering av målgrupper og korleis du vil marknadsføre aktivitetane/produkta.
4. I planlegginga for kommande sesong må hotellet tilsetje fleire medarbeidarar. Leiaren vil ha råd frå deg om korleis rekrutteringsprosessen kan gjennomførast.