Modem og medieomformarar
Omgrepa medieomformar og modem blir ofte brukte om kvarandre, men det er ein forskjell på desse.
Namn | Mediebyte | Protokollbyte |
|---|---|---|
Modem | X | X |
Medieomformar | X |
Modem
Omgrepet modem er sett saman av mo- i "modulere" og dem- i "demodulere". Modem vart originalt brukt for å sende digitale data over analoge telefonlinjer. Telefonlinjene var tilpassa overføring av lydfrekvensane som vi menneske bruker når vi snakkar. Det digitale signalet måtte derfor modulerast om til høyrbar lyd og demodulerast på den andre sida.
I tillegg til sjølve mediebytet bruker modem eigne protokollar som er annleis enn dei som blir brukte i dei lokale nettverka. I dag blir modemomgrepet brukt mellom anna om breibandsmodem, fibermodem og 4G/5G-modem.
Modemoppringing
Tekstversjon
Medieomformar (media converter)
Medieomformarar er enklare enn modem fordi dei berre byter mediet som datasignalet sender via. Til dømes byter dei mellom elektriske pulsar i ein nettverkskabel og lyspulsar i ein fiberkabel. Ingen byte av andre nettverksprotokollar er naudsynt.
Medieomformarar kan vere sjølvstendige eksterne einingar eller modulære for installasjon i nettverksutstyr som svitsjar eller ruterar. Slike medieomformarar kallar vi ofte transceiver-modular.
Større svitsjar som er laga for bruk i bedriftsnettverk, har ofte SFP- og SFP+- portar. Desse portane gjer det mogleg å byggje ut svitsjen med ønskjelege medieomformarar. Den modulære løysinga er kostnadseffektiv og gjer det lettare å tilpasse svitsjen etter behovet og dei fiberstandardane som er ønskjelege.
Koparbaserte nettverkskablar er mykje brukt i lokale nettverk i bedrifter og private heimar. Kablane er billege og enkle å installere, men eit enkelt kabelstrekk kan ikkje vere lengre enn hundre meter, og kabelprisen går raskt opp viss du ønskjer hastigheiter over 1 Gbit.
For strekk over hundre meter, til dømes mellom etasjar i ein bygning eller mellom bygningar, er koparbaserte nettverkskablar upraktiske. Fiberkablar kan vere mykje lengre og tilbyr raskare fart. Derfor er dei ofte eit betre alternativ, sjølv om dei som oftast er dyrare og meir krevjande å få installert.
I bedriftsnettverk er det derfor veldig vanleg med ei blanding av fiber og koparbaserte nettverkskablar.
Relatert innhald
Digitalisering er når når vi gjer om eit signal frå analog til digital form. Dette gjer handteringa av informasjonen lettare, men vi mistar kvalitet.
Analog og digital er forskjellige måtar vi handsamar og overfører informasjon på. Som mediaskapar er det viktig å kjenne til skilnaden på desse.