Arbeidsoppdrag
Lag ein salsplakat
Produser ein salsplakat for å selje ein gjenstand. Bruk det du har lært om argumentasjon og retorikk i utforminga.
Kva retoriske grep vert brukt i plakaten for å selje ei underbukse? Bilete: Jürgen Raible / CC BY-NC-SA 4.0
No skal du bruke det du har lært om argumentasjon og retorikk for å få selt ein gjenstand. Du må tenkje gjennom korleis du argumenterer og bruker retoriske verkemiddel i din eigen produksjon.
Oppdraget er å lage ein plakat for å selje ein gjenstand. Målgruppa er medelevane dine.
- ein fengjande tittel som vekkjer interesse
- tekst som speler på alle dei tre retoriske appellformene (etos, logos og patos)
- illustrasjon eller bilete
- Bruk fleirtalsknepet (det fleirtalet gjer, er riktig).
- Bruk autoritetar eller ekspertar.
- Skaff deg truverd.
- Finn fakta.
- Appeller til mottakaren sitt verdisyn og/eller haldningar.
- Ver oppriktig.
Når du er ferdig, skal du vise og forklare plakaten din til ein medelev. Still kvarandre følgjande spørsmål:
- Vekkjer tittelen min interesse?
- Speler plakaten på både etos, logos og patos?
- Korleis fungerer biletet eller illustrasjonen i samspel med teksten?
- Blir du overtydd til kjøp? Kva kunne ha vore betre?
De kan gjerne finne på eigne ting de kan selje òg, men prøv då å kome på ting som liknar litt på forslaga under.
- kasse med kortklipte Barbie-dokker
- 50 tannbørstar
- Kaptein Sabeltann-hatt som manglar fjør
- ubrukte gifteringar gravert med "A+M"
- FM-radio med kassettspelar
- 100 pakkar nudlar
- sjakkspel utan kongar
- russedress frå 2020
- DVD-spelar
- klippekort på Brun og Blid som går ut om éi veke
- skidress frå 80-talet
- 50 ullteppe frå SAS
- treski og stavar