Farleg avfall frå hushald
Farleg avfall kan medføre alvorleg forureining eller fare for skade på menneske eller dyr og skal derfor behandlast særskilt.
Avfallsforskrifta § 11-10 pålegg kommunane å ta imot inntil 1 000 kg farleg avfall totalt per år per avfallseigar.
Avfallsforskrifta § 14-3 pålegg òg kommunane å få inntil 500 kg PCB-haldige isolerglasruter per år per avfallseigar. Dette kjem i tillegg til pålegg i § 11-10.
Avfallsforskrifta § 11-11 pålegg hushald som leverer farleg avfall,
- å gi opplysningar om innhaldet og eigenskapane til avfallet så langt dette er mogleg
- å sørge for at emballasjen er tydeleg merkt
- å levere farleg avfall til kommunalt mottak for farleg avfall eller i utleverte spesialdunkar eller esker
Hushald kan ha farleg avfall som
- oljeprodukt, kjemikal og målingsprodukt
- reingjerings- og vedlikehaldsprodukt som pussemiddel, flekkfjernarar, rustfjernarar, låsespray og så vidare
- produkt med kvikksølv, termometer, lysstoffrøyr, gamle batteri med meir (nye miljømerkte batteri kan kastast saman med vanleg restavfall)
- knappcellebatteri (til klokker og liknande) og oppladbare kadmium- eller iridiumbatteri (til mobiltelefonar og liknande)
- plantevernmiddel, rottegift og soppmiddel
hobbykjemikal, lim, fotokjemikal, korrekturlakk og naglelakk
Innsamlarane tek vare på det farlege avfallet i konteinarar og transporterer det til behandlingsanlegg for spesialavfall. Det nasjonale anlegget vårt for farleg avfall ligg på Langøya utanfor Holmestrand. Det blir drive av selskapet NOAH.
