Refleksjonsoppgåver til feltrapporten
Sjå for dykk at de er på feltarbeid i fjøra og skal undersøkje vasskvaliteten.
Oppgåvebeskriving for undersøking av vasskvalitet
På sida blir det gitt fem ulike feltoppgåver om vasskvalitet. Vel to av desse oppgåvene, og diskuter ulike hypotesar som kan setjast fram til desse. Kva må de tenkje på når de formulerer hypotesar?
Tenk at de gjer målingar av surleiksgrada i havet (pH) på feltlokaliteten og får resultat som i tabellen under.
Diskuter korleis de best kan vise resultata grafisk i ein feltrapport, og korleis de kan formulere ulike tolkingar av målingane. Drøft òg kva feilkjelder desse målingane kan ha, og korleis de ville forklart klassen kva pH er, under ein tenkt presentasjon av feltrapporten. Kva illustrasjonar ville vere viktige å bruke til dette avsnittet i rapporten?
Djupn | pH, lokalitet 1 | pH, lokalitet 2 | pH, lokalitet 3 |
|---|---|---|---|
Overflate | 7,2 | 7,5 | 7,6 |
1 meter | 7,9 | 8,0 | 7,2 |
10 meter | 8,2 | 8,0 | 8,3 |
Fugleobservasjonar er ei feltoppgåve om observasjon av fugl ved eksponert fjøre. Tenk deg at du og resten av gruppa di observerte fuglar ein heil dag då de var på feltarbeid, og at de har teke notat frå kamuflasjeteltet (sjå tabell).
Feltoppgåve om fugleobservasjonar
Drøft i gruppa korleis de kan arbeide med desse resultata, og korleis de kan presentere observasjonane i feltrapporten. Kva illustrasjonar ville de ha brukt, og kva typar åtferd hos fuglane ville de ha lagt særleg vekt på å forklare?
Tidspunkt | Art | Observert (tal og åtferd) |
|---|---|---|
08.00 | Svartbak | 8 stk. Aktive, åt fisk på land. |
08.00 | Fiskemåse (?) | Mange, minst 20. Hylte og skreik. I flukt. |
08.40 | Mink (!) | Skremde alle måsane. Sumde langs land. |
09.15 | Ein flokk ender, stokkender? | Flaug hurtig over bukta. Cirka 15 stk. |
10.05 | Småfuglar (lerker?) | 4–5 stk. Åt i taren som låg langs stranda. Vi ser desse gjennom heile ettermiddagen, av og til éin, andre gonger 3–4 stk. Dei liker seg her. |
11.00 | Matpause i teltet | Kari har makrell i tomat på brødskiva. |
12.15 | Lakseand | Eit par, flotte! Hann og ho, dykkar etter mat. |
12.25 | Vandrefalk | Flaug hurtig over bukta, lakseendene flaug av stad. |
14.10 | Svartbak | 2 stk. Sette seg på skjeret, den eine står på eitt bein! Dovne fuglar. |
14.15 | Falken kom tilbake | Flaug hurtig over bukta. Måsane stakk av. |
14.30 | Ærfugl | 6 stk. 4 hannar, 2 hoer. Dykkar. Kva et dei? Sym over bukta, forsvinn bak odden. |
15.10 | Måsar | Ein sjark kjem mot land. Ein haug med måsar følgjer etter. Måsane skrik og plukkar opp fiskeavfall. |
15.30 | Måsar, fiskemåsar, svartbak, gråmåse, sildemåse? | Mange, minst 50. Fleire artar. Ein har gule bein og svarte vengjer. Ligg på vatnet i bukta, nokre sit på skjeret. Lagar mykje lyd. For eit måseliv! |
16.10 | Falken kom endå ein gong | Flaug hurtig over bukta, måsane letta og hylte som besette. |