Forsøk: Modellering av mellomgolvet
Mellomgolvet er ein muskel som skil dei to kroppsholene i overkroppen. I brysthola finn vi hjartet som ligg mellom to lunger, og bukhola inneheld organ som er del av organsystem for fordøying og formeiring. Mellomgolvet er i botnen av brysthola og speler ei viktig rolle for pustebevegelsen.
I denne aktiviteten skal du lage ein modell av mellomgolvet. Denne modellen skal du bruke til å setje opp ein hypotese for kva funksjon mellomgolvet har for pustebevegelsene våre. Du skal deretter undersøkje om hypotesen din stemmer med det du finn i teorien.
Bruk ein saks til å dele brusflaska i to. Du skal bruke toppen av flaska vidare.
Bruk tape (gjerne markeringstape) rundt kanten der du klipte opp flaska, slik at den ru kanten ikkje lagar hol i hansken.
Plasser ein ballong i flasketuten, og brett han over kanten
Fest plasthansken i botnen av den halve flaska.
Dra plasthansken forsiktig ned og opp. Kva skjer med ballongen?
La plasthansken representere mellomgolvet og ballongen representere lungene. Lag ein hypotese for korleis du meiner at mellomgolvet hjelper til med pustebevegelsen.
Undersøk om hypotesen din stemmer ved å samanlikne han med fagstoffet du finn.
Det er ikkje berre mellomgolvet som har ei viktig rolle i pustebevegelsen. Undersøk kva andre faktorar som er involverte i dette.