Hekta? Eit kodekammer om den digitale kvardagen din

Mobiltelefonar, datamaskiner og digitale løysingar omgir oss heile tida. Derfor er det viktig å ha ei kritisk forståing av korleis digitaliseringa påverkar oss, slik at vi kan takle den digitale kvardagen vår på ein betre måte.

Gjennom å spele kodekammeret "Hekta?" skal du bli meir klar over ulike perspektiv på den digitale kvardagen din. Eit kodekammer er eit rom der vi må løyse nokre kodar for å komme oss vidare. Kodekammeret "Hekta?" består av fire rom. Romma tek for seg fire ulike perspektiv:

• Teknologien: Korleis blir algoritmar, stordata og kunstig intelligens brukt til å påverke oss?

• Hjernen: Korleis blir belønningssystemet til hjernen utnytta i digitale løysingar?

• Det sosiale: Korleis kan spel og sosiale medium tilfredsstille eller utnytte dei sosiale behova våre?

• Pengane: Korleis kan algoritmar og personopplysningar brukast til å tene pengar?

I etterarbeidet skal de fordjupe dykk meir i dei ulike perspektiva. Etterpå skal de løyse ulike praktiske casar ved hjelp av dei fire perspektiva. Dette jobbar de saman med i grupper.

Spel kodekammeret "Hekta?"

Denne læringsressursen er utvikla i samarbeid med Medietilsynet.