Skriftleg case – SNAXX

Her er ei caseoppgåve om den fiktive snackprodusenten SNAXX. Oppgåva kan brukast som øving til ein eventuell skriftleg eksamen.

Flak av potetgull ligg strøydde på eit bord. Foto.

Retningslinjer for eksamen

Hjelpemiddel er tillatne, med det er ikkje tillate å kommunisere med andre på nettet eller på andre måtar.
Du har tilgang til eit avgrensa utval nettbaserte hjelpemiddel, men ikkje internett elles. Du vil mellom anna ha tilgang til læringsressursar på NDLA. Sjå elles oversikt over nettressursar til eksamen – Novari.
Det er ikkje tillate å nytte automatisk tekstgenerator som praterobot eller tilsvarande teknologi.
Sentralt gitt skriftleg eksamen i marknadsføring og leiing 2 varer i fem timar.
Her finn du dei offisielle vurderingskriteria for sentralt gitt skriftleg eksamen i marknadsføring og leiing 2, utarbeidde av Utdanningsdirektoratet:

Vurderingskriterium SAM 3046(DOCX)

Situasjonsbeskriving

SNAXX er ein norsk produsent av snackprodukt som blei starta av tre unge entreprenørar med lidenskap for matglede og sunnare snackalternativ – utan at det går ut over smaken. Produktsortimentet består mellom anna av omnsbakte chips av rotgrønsaker, linsebasert snacks og ulike frukt- og nøttebarar. Produkta er laga med naturlege ingrediensar og utan kunstige tilsetjingsstoff, og dei er retta mot ei yngre, bevisst målgruppe som søker smakfulle snacks utan dårleg samvit.

Verksemda har, i tillegg til innpass hos ei norsk daglegvarekjede, satsa på direkte distribusjon via eigen nettbutikk, der dei tilbyr abonnementsløysingar og pakkar med eksklusive limited edition-produkt.

Etter tre år med vekst har SNAXX begynt å møte på nokre utfordringar. Marknaden for snackprodukt blir stadig meir konkurranseprega, både frå veletablerte merkevarer som Maarud og Kims, som kjem med nye lanseringar, men òg frå nye, kreative aktørar. SNAXX merkar at deira marknadsdel er under press, og enkelte produkt har ikkje selt like godt som forventa det siste året.

SNAXX har òg utfordringar internt. Det har vore stor gjennomstrøyming blant tilsette det siste året, spesielt i sals- og marknadsavdelinga. Fleire medarbeidarar oppgir utydeleg leiing, dårleg kommunikasjon og lite motivasjon som grunnar til at dei har slutta. Arbeidsmiljøet blir prega av uvisse og låg trivsel.

I tillegg til opplysningane i situasjonsbeskrivinga ovanfor må du ta eigne føresetnader der du meiner det er nødvendig.

Oppgåve

Del 1

Vurder og gi grunngitte tilrådingar til korleis SNAXX kan jobbe for å bli ei sterk merkevare med ein tydeleg posisjon i marknaden.

Del 2

Drøft ulike faktorar som påverkar prissetjing, og gi grunngitte tilrådingar til prissetjing av SNAXX-produkta.

Del 3

Vurder og gi grunngitte tilrådingar til korleis leiinga i SNAXX kan jobbe med internmarknadsføring.

Tips til å skrive eit godt svar

Les oppgåvene og situasjonsbeskrivinga nøye før du begynner å svare på oppgåvene. Sikre deg at du forstår kva oppgåvene ber deg om.
Svar presist og relevant på det oppgåva ber deg om.
Merk deg handlingsverb i oppgåvene, slik at du drøfter der du blir beden om å drøfte og så vidare.
Jobb med å skape ein god struktur i svaret. Sørg for ein raud tråd gjennom teksten til kvar oppgåve.
Bruk formålstenlege kjelder og siter og vis på ein etterprøvbar måte.
Bruk og definer relevante fagomgrep.
Bruk relevant fagstoff, faktainformasjon og refleksjon for å komme fram til og underbygge grunngivingar, framheve poeng og komme med tilrådingar. Gjer greie for val du tek undervegs i svaret.