Marknadsføringskampanje for Trøll
Ein marknadsføringskampanje handlar om å skape merksemd rundt eit produkt, slik at det fører til auka sal og auka inntekter.
Marknadsføringskampanjar består av ei rekke aktivitetar i ulike medium og på ulike plattformer i ein bestemd tidsperiode og med eit bestemt mål.
Les meir i artikkelen "Kva er ein marknadsføringskampanje?"
Tenk over
Kva for marknadsføringskampanjar har du lagt merke til i det siste?
Marknadsføring versus marknadsføringskampanje
Marknadsføring er noko som går føre seg stort sett kontinuerleg for å skape merksemd rundt eit produkt eller ei merkevare. Ein marknadsføringskampanje derimot blir gjennomført i ein bestemd tidsperiode, gjennomsnittleg i 45 dagar.
Marknadsføringskampanjar må planleggast nøye og utformast og styrast aktivt for å bli vellykka. Vi kan dele arbeidet med ein marknadsføringskampanje inn i seks trinn.
Les meir i artikkelen "Planleggje ein enkel marknadsføringskampanje".
Trinn 1: Sette mål og budsjett for kampanjen
Når vi skal planlegge ein marknadsføringskampanje, er det viktig at vi har klart for oss kva vi ønsker å oppnå med kampanjen – kva som er målet.
Vi må òg innleiingsvis setje opp ei kostnadsramme for kampanjen, sidan dette vil påverke moglegheitsrommet med tanke på val av kanalar og aktivitetar.
Trinn 2: Velje målgruppe
For å skape ein effektiv marknadsføringskampanje må vi ha klart for oss kven som er målgruppa for kampanjen. Val av målgruppe påverkar dei neste trinna, som er utforming av bodskap og val av kommunikasjonskanalar.
Trinn 3: Formulere bodskap
Når vi skal utforme bodskapen, må vi huske på at ein marknadsføringskampanje skal, i tillegg til å marknadsføre eit produkt, formidle verdiane til bedrifta og overordna visjon.
Kva er det vi ønsker å få formidle, og korleis skal vi formulere bodskapen vår? Skal vi spele på kjensler? Skal det vere morosamt, informativt eller underhaldande?
Les artikkelen "Kva ønskjer vi å seie til målgruppa vår?"
Trinn 4: Velje kanalar
Kva for kanalar skal vi bruke? Er det TV, radio, sosiale medium, influensarar eller andre?
Vi kan òg bruke fysiske kanalar, som marknadsføringsstand og reklameplakatar.
Trinn 5: Gjennomføring
No skal vi setje i verk marknadsføringskampanjen som består av ei rekke ulike aktivitetar, gjerne fordelt på ein periode på 45 dagar. I dette trinnet må vi sørge for at alt fungerer som det skal og eventuelt justere undervegs.
Trinn 6: Evaluering
I evalueringsfasen skal vi måle effekten av marknadsføringskampanjen. Dette kan til dømes gjerast ved å sjå på
kjennskap
engasjement på sosiale medium
salstal
marknadsdel
Relatert innhald
Vi skal no steg for steg gå gjennom korleis vi kan lage ein enkel marknadsføringskampanje. Vi viser eit døme på korleis ein kampanje kan sjå ut.
Ein marknadsføringskampanje er ein aktivitet som går føre seg ein kortare periode. Kampanjen er gjerne planlagd på førehand som ein del av marknadsplanen.