Berekraftige reiselivsdestinasjonar i utlandet

Begrensa bruk

Bilete: Pixabay.com

Fleire og fleire turistar i dag er meir opptekne av å reise "grønt", og denne marknaden veks. Denne trenden stiller store krav til destinasjonar som ønskjer denne marknaden velkomen. Reiselivsbedrifter og destinasjonar som satsar på ei berekraftig utvikling, investerer ikkje berre i miljøet, men også i si eiga framtid. Ein berekraftig reiselivsdestinasjon gir positive ringverknader til samfunnet, i form av både lokal, regional og nasjonal utvikling, sosial velferd og økonomisk tryggleik.

Global Sustainable Tourism Council (GSTC) er ein medlemsbasert organisasjon som jobbar med sertifiseringar av berekraftig reiseliv. GSTC sin standard er tett kopla opp til FNs berekraftsmål, og er eit verktøy for reiselivsdestinasjonar globalt. I Noreg har vi merkeordninga "Merket for berekraftig reisemål", som er ein standard utarbeidd av Innovasjon Noreg og godkjend av GSTC.

Nokre reiselivsdestinasjonar viser veg. TimeOut, eit internasjonalt reisemagasin, har trekt fram sju spennande destinasjonar i 2021 som alle går i brodden som gode døme på berekraftige reiselivsdestinasjonar. Destinasjonane er:

Wales

Wales er ei halvøy som ligg sørvest i Storbritannia. Wales er kanskje mest kjent for naturen, sauane og dei mange slotta sine.

Opne bilete i eit nytt vindauge

CC BY-SA

Bilete: Hefin Owen

Dei mest besøkte byane er Anglesey, Snowdon og Pembrokeshire. Litt utanfor kjedehotella og pubane i byane er det fokus på lokale overnattingsstader og restaurantar. Lokal mat og "frå jord til bord" sørgjer for at pengar går tilbake til lokalsamfunna, og at gardane i området får til ei berekraftig drift. Strategiplanen "Welcome to Wales: Priorities for the visitor economy 2020–2025" blei lansert i 2020 og gir klare retningslinjer for korleis berekraft skal prioriterast i tida framover.

Costa Rica

På Costa Rica i Mellom-Amerika er 25 prosent av landet allereie ei verna sone, og dei har ein plan for å bli karbonnøytrale innan 2050. Dei tilbyr natur- og miljøvenlege turistaktivitetar, som til dømes jungelturar, delfinsafari og padling. Hotellet Lapa Rios Eco Lodge tilbyr berekraftig overnatting i regnskogen.

Opne bilete i eit nytt vindauge

CC BY-NC-ND

Bilete: Matthew Paulson

Visjonen deira er "to demonstrate that responsible tourism can be profitable and therefore a successful vehicle for ensuring wilderness preservation".

Sri Lanka

Sri Lanka er ei øy i Indiahavet, som er eit marint dyrelivsparadis. I områda rundt Sri Lanka kjem kvalar for å yngle. Kvalsafari er derfor ein veldig populær aktivitet i høgsesongen, så populært at kvalane var i ferd med å bli jaga bort. No er det oppretta fleire organisasjonar som jobbar mellom anna for å fremje ein ansvarleg kvalsafari.

Opne bilete i eit nytt vindauge

CC BY

Bilete: Jose Ozorio

Sri Lanka Tourism Development reknar berekraft som ein nøkkeldrivar for å utvikle og verne natur- og kulturarven på øya. Det er no etablert ei merkeordning, liknande den vi har i Noreg, som heiter National Sustainable Tourism Certification Scheme (NSTCS) for Sri Lanka Tourism.

Slovenia

Slovenia er eit land i Sentral-Europa som jobbar hardt for å vere ein berekraftig reiselivsdestinasjon. Det slovenske turistrådet har visjonen "A green boutique global destination for high-end visitors seeking diverse and active experiences, peace and personal benefits. A destination of five-star experiences". Visjonen viser tydeleg at landet ønskjer å satse på kvalitet og ikkje kvantitet, og at dei ønskjer turistar som er på utkikk etter ein aktiv ferie.

Slovenia har eit eige nasjonalt sertifiseringssystem, "The Green Scheme of Slovenian Tourism". Sertifiseringsordninga består av 11 trinn, som turoperatørar, overnattingsstader, restaurantar og andre reiselivsbedrifter som ønskjer å bli med, kan bruke som eit styringsverktøy.

Opne bilete i eit nytt vindauge

CC BY-SA

Bilete: Gilad Topaz

Turistar reiser først og fremst til Slovenia for å oppleve natur og kultur, og dei mest kjende reisemåla er byane Bled, Ljubljana og Piran.

Bhutan

I 2020 fekk Bhutan, som ligg aust i Himalaya, førsteplassen av land som må besøkjast, av reiseinspirator Lonely Planet. Bhutan går i brodden som eit veldig godt døme på korleis ein berekraftig reiselivsdestinasjon kan organiserast. Turistar reiser til Bhutan for å oppleve natur, kultur, arkitektur og festivalar.

I Bhutan har dei ei øvre grense på kor mange turistar som får lov til å kome kvart år. I tillegg må du som turist betale ei avgift for berekraftig utvikling (SDF) om du ønskjer å besøkje dei mest populære reisemåla i landet. Avgifta er innført for å verne økologien i landet. Ifølgje Kilroy reisebyrå er den daglege turistavgifta på omtrent 2 000 norske kroner, og ho må betalast før avreise. Men avgifta inkluderer

• overnatting på minimum trestjerners hotell

• alle måltid – frukost, lunsj, middag

• ein lisensiert, bhutansk turguide

• all innanlands transport – med unntak av flyreiser

• utstyr og transport for camping og fotturar

• alle interne skattar og avgifter

• ein royalty på 65 dollar som går direkte til regjeringa for å gi gratis utdanning og helsetenester, og for å motverke fattigdom

Botswana

Botswana har lenge vore ein ettertrakta safaridestinasjon sør i Afrika. No blir safariverksemda regulert for å sikre ei berekraftig utvikling som tek vare på naturen, dei ville dyra og folka som bur der. Botswana har med dei mange dyrereservata sine stort fokus på å bevare den villmarka som er att i Afrika. Ein femtedel av Botswana er dyrereservat.

Opne bilete i eit nytt vindauge

CC BY

Bilete: Jorge Láscar

Botswana satsar på økomarknaden, slik at dei kan verne naturskattane i landet samtidig som det lèt lokalbefolkninga dra nytte av dyreliv i eit berekraftig reiseliv. Botswana Tourism Organisation (BTO) har òg innført eit sertifiseringssystem i samarbeid med GSTC. Ordninga, Botswana Ecotourism Certification System, støttar reiselivsbedrifter som tilbyr miljøvenlege og berekraftige kvalitetsprodukt til turistar.

Italia

Italia satsar no stort på agriturisme, eller gardsferie. Over 20 000 driftsgardar er med i ei sertifiseringsordning for å sikre eit berekraftig produkt. Italian Association for Responsible Tourism (IART) har publisert eit kart over ulike reisemål i Italia som tilfredsstiller krava til å kalle seg berekraftig reisemål. Dette inkludert småbyar og tettstader som høyrer til nettverket Borghi Autentici d'Italia, fleire naturreservat, overnattingsstader og økologiske gardar.

Turistar reiser til Italia for både natur og kultur, men også for å besøkje nokre av dei verdskjende byane Roma, Venezia, Firenze og Milano. Italia har òg flotte alpeområde som er mykje besøkte, sommar som vinter.

Opne bilete i eit nytt vindauge

CC BY-NC-SA

Bilete: Science Photo Library, NTB