Gellie almetjh maehtieh meatan draamesne årrodh. Dah unnebe jallh stuerebe råållah utnieh. Dah maehtieh draaman mietie jorkesidh jallh dah maehtieh seammalaakan draaman tjïrrh årrodh.
Åejvie-almetjh
Åejvie-almetjh draamesne leah dah mah mijjieh dååjrebe vihkielommes draamesne. Naan dorjehtimmesne lea akte tjïelkes åejvie-almetje, jïh jeatjah dorjehtimmine dellie gellie almetjh seamma vihkeles. Shakespearen dorjehtimmesne "Romeo jïh Julia" lea dovne Romeo jïh Julia åejvie-almetjh. Gåabpatjahkh seamma ulmiem utniejægan, dah guaktah sïjhtijægan aktine jieledh, jïh dah gaajhkem darjoejægan guktie ulmiem jaksedh.
Dah mubpieh almetjh draamesne
Dah mubpieh almetjh draamesne karakteerh, mah eah leah dorjehtimmien jarngesne. Daamhtaj dah aelhkies karakteerh mah eah dorjehtimmien mietie skearkegh. Men dah åejvie-almetjem viehkiehtieh dahkoem skaepiedidh.
Baakoeh
| Saemien | Daaroen |
|---|---|
| mubpieh almetjh | bipersoner |
CC BY-NC-SAWritten by: Marion Federl, Tone Elisabeth Grundvig and Helen Blind Brandsfjell.
Last revised date 11/23/2018