Bïenje mov
Albert Jåma
Tjebrien gujht månnoeh –
Guhkies hov biejjieh –
tjïeskeles, löövlehkes
Luvregs gujht læjhkan
Gosse mån gohtjedem
flïjmerden mojjehten –
mov gåajka båata,
madtjeles eadtjohke
Ih gujht nïerh dåålvedidh
maaje dan luste
garvestidh buvvedh
nimhtie dov vuekie
Tjoerem gujht nihtedh
Barkoe hov monnen –
Raedtie dan vijries
Juelkieh dan åenehks
Månnoeh dan sæjloes
Buerebe tïjje
Båetije biejjieh
Dåajvohtem dutnjien
Saajve-aajmoe daajrah
Desnie min dïervesjien
Jijhteles biejjien
Åeremen mænngan
Desnie dån åadtjoeh
Dåålvedidh barhvesjidh
Guktie dån håajsoeh
Abpe biejjiem
Jïh gosse iehkede
barhvh aaj vihth tjuedtjielieh –
jirreden maahtah
dejtie viht dåålvedidh
Jïh mearan datne
Dejnie dån gïehtelh
Saajve-ealoem vaarrestem
Stööremes ealoe
Gaaltije
Jåma, A., Joma, L. K. & Granefjell, Aa. J. (2004). Gorredh gïelem. Fylkesmannen i Nordland.