Bïerne

Dej beeli goh Lutniestæjja daennie eatnamisnie fïelestalleminie, nåå gellien aejkien gujht båata almetji gåajkoe. Sæjhta aaj naan viehkiem. Ijje, ij annje åadtjoeh gænnah. Gaajhkesh utnin, eah gujht sijjieh dam daarpesjh viehkiehtidh, eah gujht sijjieh dam doesth viehkiehtidh gænnah, guktie gellien aejkien baanhtsan sjædta gukt' edtja aaj baahtsedh.

Akten aejkien dellie lij baenhtsesne, edtja stoerre jeanoen rastah. Ij lij dej beeli naan vïnhtsh jallh mij gænnah, guktie tjoerin pluahtam stealladidh jïh aaj numhtie rastah. Idtji guhtegh sïjhth, såemies idtjin aaksjoem utnieh, såemies idtjin maam utnieh. Dellie maa Lutniestæjja måjhtije satne maa edtja vaedtsedh jïjtse kreekigujmie soptsestidh, mah dah maehtieh viehkiehtidh.

Dle båata bovtsi gåajkoe, jïh jeahta: «Dijjieh mannem lutnjestidie rastah dom johkem?»
«Ibie maa mijjieh maehtieh,» bovtsh svååroeh, «biejjie guaka, bïjvele sjædta, ibie maa mijjieh.» Guktie dah feerin tsuvvien bæjjese don tjahkese.

«Jaa, jaa,» Lutniestæjja ussjede, «åadtjodh edtjede tsuvvedh, jïh biejjie edtja baahkedidh, åadtjodh edtjede snaabredh bijjene.» Jïh numhtie dam bovtse dehtie biejjeste bælla goh mest'em.

Dellie vaadtsije våålese, veanhta edtja naan jeatjagidie råakedh. Dle ij goh jeatjegem råakh enn goh bïernem.

Dellie jeahta dan bïernese: «Daan biejjien bïjvele, baahke.»
«Jaa nov lea baahke, jalts ij leah gujht ov alvas baahke,» bïerne jeahta.

Die Lutniestæjja jeahta: «Datne dejnie jïjtjedh boevteres muadtine, datne mannem saehtieh rastah dam jeanoem, manne edtjem maaje don bealan.»

«Doesth tjihkedidh dan mov rudtjen nille?» bïerne jeahta.

«Jis im lim doesteme, im mån lim gihtjeme,» Lutniestæjja svååroe. «Tjihkedh rudtjen nille, dell' edtjem manne saehtielidh,» bïerne viht. Dle ojhte, Lutniestæjja tjihkede bïernen rudtjen nille, jïh bïerne vuaja dom dulvies jeanoem rastah.

Dellie Lutniestæjja jeahta: «Jaa, datne edtjh slyöhpedh jïjtjedh beapmoej åvteste barkedh jïh sæjlodh jaepiem bïjre. Maaksojne edtjh åadtjodh gaajhke daelviem åeredh. Datne edtjh åadtjodh åeredh goske biejjie baahkede, dell' edtjh tjuedtjielidh bæjjese jïh vuartasjidh maam dle vuajnah.»

Numhtie dam bïerne dan hijven åtna.