Mij håaleme?
Politihkeles håalemh edtjieh goltelæjjah jaehkiehtidh. Politihkerh tjuerieh maehtedh åenehks appellh jïh digkiedimmie-lahtestimmieh hööltedh.
Mijjieh maehtebe aaj håalodh ovmessie feestine jïh mïerhke-biejjine. Håaleminie maehtebe jeatjebem jallh jeatjabidie dovne girmedh jïh earoehtidh, jallh maehtebe sjïere biejjien bïjre soptsestidh.
Eah ajve gånka, Saemiedigkien presideente jallh politihkerh mah tjuerieh maehtedh håalodh. Mijjieh gaajhkesh, daarpesjibie naan aejkien håalodh – kaanne skyllemisnie, hïejesne, akten reakeds-biejjien jallh barkosne. Reaktoe jïh tjaebpies baakoeh almetji bïjre jiehtedh, vihkeles maehtedh. Ih daarpesjh guhkies jallh joekoen sjïere håalemem tjaeledh, men edtjh mubpide geerjehtidh jallh soelkehtidh.
Gosse datne edtjh håalodh, dellie daamhtaj tjoerh eensilaakan håaleminie barkedh, dovne gïeleldh jïh guktie edtjh håalemem bigkedh. Lissine tjoerh aamhtesem sjiehteleslaakan gïetedidh.
Baakoeh, mah datne veeljh nuhtjedh, leah vihkeles håalemisnie. Naan aejkien maahtah musihkem jallh guvvieh nuhtjedh lissine. Men mujhtieh, hijven håaloje gïelem jïh kråahpe-gïelem viehkine nuhtjie. Jïh minngemes, mujhtieh håaloje tjuara sjiehteleslaakan tseahkan gåårvedidh.