Guktie iktemierien teekstem tjaeledh
Vuartesjh boelhkide: Daesnie göökte joekehts boelhkh gusnie tjaelije aevhkieh jïh dåeriesmoerh sosijaale meedijigujmie digkede. Voestes boelhkesne tjaelije nåake iktemierien teekstem tjaaleme, men mubpene boelhkesne teekste buerebe. Man åvteste? Buerkesth.
1. boelhke
Ussjedh jis Aanna guvviem jïjtsistie bæjhkohte mearan dïhte feestesne sov lustes voelpigujmie. Saara guvviem vuajna, men ij feestese bööreme. Vuesiehtimmien gaavhtan Snapchat lea sosijaale medije maam gellie noerh nuhtjieh. Naemhtie Saara damta satne ålkoelisnie. Akte dåeriesmoere sosijaale medijinie gaajhke maam datne darjoeh, gaajhkesh maehtieh vuejnedh. Gellie noerh raassan sjidtieh, dan åvteste gaajhkesh maehtieh vuejnedh eah meatan dåehkesne.
2. boelhke
Akte dåeriesmoere sosijaale medijinie gaajhke maam datne darjoeh, gaajhkesh maehtieh vuejnedh. Gellie noerh raassan sjidtieh, dan åvteste gaajhkesh maehtieh vuejnedh eah meatan dåehkesne. Vuesiehtimmien gaavhtan Snapchat lea sosijaale medije maam gellie noerh nuhtjieh. Ussjedh jis Aanna guvviem jïjtjistie Snapchatesne bæjhkohte mearan dïhte feestesne sov lustes voelpigujmie. Saara guvviem vuajna, men ij feestese bööreme. Naemhtie Saara damta satne ålkoelisnie.
Daelie edtjh raajesidie reaktoe öörnegen mietie bïejedh.
Guktie sïjhth raajesidie öörnedh? Minngemes edtjh bïhkedidh man åvteste öörnegem veeljeme.
Bïejh raajesidie reaktoe öörnegen mietie. Maahtah baakoeh lissiehtidh jis daerpies juktie iktemierien teekste sjædta.
Daan biejjien dle læjhkan jeenjesh mah aalkeme viskes utnedh gaptesne jïh boenge-skuvmesne. Såemies båeries almetjh jïh naan jeatjebh dam viskes klaeriem utnin sijjen gaptine jïh boenge-skuvmine 1800-låhkoen jïh voestes lehkien raajan 1900-låhkoste. Viskes, biejjien væhta, utnin aaj goh sådteres, jïh dan åvteste almetjh idtjin sïjhth dam viskes klaeriem utnedh. Viskes seamma vaassje-geajnoem åadtjoeji goh gievrie jïh vuelie. Annje almetjh tuhtjieh luhpehts viskes nåhtadidh, men eah daejrieh mannasinie.
Daelie edtjh göökte boelhkh mobijle-nuhtjemen bïjre skuvlesne tjaeledh.
- Tjaelieh teema-raajesem gusnie argumenteredh learohkh edtjieh luhpiem åadtjodh mobijlem skuvlesne nuhtjedh.
- Tjaelieh teema-raajesem gusnie argumenteredh luhpehts mobijlem skuvlesne nuhtjedh.
Tjaelieh lahtestimmie-raajesh teema-raajesidie.
Mujhtieh!
Datne edtjh göökte boelhkh tjaeledh. Voestegh edtjh argumenteradidh man åvteste learohkh edtjieh åadtjodh mobijlem skuvlesne nuhtjedh. Mubpene boelhkesne edtjh argumenteradidh man åvteste eah learohkh edtjh åadtjodh mobijlem skuvlesne nuhtjedh.
Minngemes:
Digkedh dov teekstem lohkehtæjjine jallh klaasse-voelpine. Datne raajesidie logihke öörnegen mietie tjaaleme? Mij hijven dov teekstine jïh maam maahtah bueriedidh.