Lågt blodsukker (føling)

Denne tilstanden oppstår viss personen har fått i seg for mykje insulin i forhold til matinntaket. Det er òg andre faktorar som kan føre til at blodsukkeret til personen blir for lågt, til dømes kan fysisk aktivitet, alkohol og stress vere med på å senke blodsukkeret. Symptom på lågt blodsukker kjem gjerne raskt.

Teikn på lågt blodsukker

bleikheit, sveitte, hjartebank
føler seg skjelven
svoltkjensle
føler seg svak og sliten
endra åtferd, aggressivitet
mistar medvitet
krampar

Film om førstehjelp ved lågt blodsukker når personen er medviten (1:59)

Førstehjelpstiltak ved lågt blodsukker når personen er medviten

Gi noko søtt, til dømes jus, mjølk eller anna sukkerhaldig drikke.
Gi deretter mat som inneheld langsame karbohydrat, til dømes ei brødskive med honning/syltetøy.
Bli hos personen til hen har ete opp maten, og følg med på korleis hen har det.
Skulle personen igjen få kraftige teikn på lågt blodsukker, ring 113 og be om hjelp.

Film om førstehjelp ved lågt blodsukker når personen er medvitslaus (1:33)

Førstehjelpstiltak ved lågt blodsukker når personen er medvitslaus

Ring 113, her vil du få rettleiing og hjelp.
Smør honning på innsida av kinnet eller oppe i ganen på personen.
Vær hos personen og følg med på korleis hen har det.
Følg instruksane i artikkelen Den første undersøkinga, og følg vidare tiltak som er oppgitte her.
Viss personen vaknar, følg førstehjelpstiltak ved vaken person som angitt lenger opp på sida, men forsikre deg om at personen er ordentleg vaken og kan svelge, før du gir hen noko å ete.

Viss du ikkje er sikker på om personen har høgt eller lågt blodsukker, skal du alltid gjere dei tiltaka som gjeld for lågt blodsukker.

Høgt blodsukker

Denne tilstanden kan oppstå viss personen har teke for lite insulin i forhold til matinntaket. Det er òg andre faktorar som kan påverke og føre til høgt blodsukker, til dømes annan sjukdom, alkoholinntak og psykisk stress.

Teikn på høgt blodsukker

gradvis dårlegare over nokre dagar, men dette kan òg kome fort
rask pust og det kan lukte aceton (neglelakkfjernar) frå munnen
medvitet kan vere nedsett
hyppig vasslating
tørstar og drikk mykje
kvalme og magesmerter kan oppstå

Førstehjelpstiltak ved høgt blodsukker

Ring 113, her vil du få rettleiing og hjelp.
Bli hos personen og følg med på korleis hen har det.
Følg instruksane i artikkelen Den første undersøkinga.
Høgt blodsukker er ein alvorleg tilstand som treng legebehandling/avansert behandling på sjukehus.

Kjelder

Høyt blodsukker ved diabetes type 1. (2019). I T. Johannessen (Red.), Norsk Helseinformatikk. Henta 15. desember 2019 frå https://nhi.no/sykdommer/hormoner-og-naring/diabetes-type-1/hoyt-blodsukker-hyperglykemi-ved-type-1-diabetes/

Høyt blodsukker, hyperglykemi, ved diabetes type 2. (2017). I T. Johannessen (Red.), Norsk Helseinformatikk. Henta 15. desember 2019 frå https://nhi.no/sykdommer/hormoner-og-naring/diabetes-type-2/hoyt-blodsukker-hyperglykemi-ved-type-2-diabetes/

Lavt blodsukker, hypoglykemi, ved diabetes mellitus. I T. Johannessen (Red.), Norsk Helseinformatikk. Henta 15. desember 2019 frå https://nhi.no/sykdommer/hormoner-og-naring/diabetes-type-1/lavt-blodsukker-hypoglykemi-ved-diabetes/

Sida har flytta, men du finn ho her: