Skap debatt i offentlegheita
Oppgåve 1: Bli inspirert!
Ungdomsskuleelevar skaper debatt om trakassering
Fjortenåringane Ella Fyhn, Ea Baklund og Ellisiv Aure skapte debatt med eit lesarinnlegg i Aftenposten om seksuell trakassering av jenter i skulekvardagen.
Trettenåringen Hermine Svortevik Oen fekk mykje merksemd med debattinnlegget "Snakk med sønnen din!" i Bergens Tidende.
a) Les debattinnlegga ovanfor.
b) Svar på desse spørsmåla:
På kva måte påverkar jentene offentlegheita med desse lesarinnlegga?
Kvifor er det viktig å diskutere spørsmål som handlar om seksuell trakassering i offentlegheita?
Kvifor er det viktig at ungdom deltek i den offentlege debatten på denne måten?
Oppgåve 2: Skriv lesarinnlegg og skap debatt
Du skal rette merksemd mot ei sak du brenn for. Skriv eit lesarinnlegg til ei avis. Målet med innlegget er at det skal skape debatt.
Skrivetips frå Bergens Tidende (BT)
Skriv så lett og engasjerande som du klarer, men ver språkleg presis.
Føreslå ein kort tittel og ingress som vekkjer nysgjerrigheita og problematiserer det du skriv om.
Kan du aktualisere teksten ved å vise til ei nyleg eller viktig hending?
Få inn konkrete døme i teksten.
Adresser gjerne innlegget slik at ein person eller institusjon kjenner seg forplikta til å svare.
Kan du spisse hovudpoenget ditt mot slutten og finne ein god "punchline"?
Oppgåve 3: Skap debatt i sosiale medium
Lag eit innlegg for sosiale medium om same sak som du skreiv lesarinnlegg om.
Innlegget skal publiserast i ein av dei sosiale mediekanalane du bruker mykje, til dømes Snapchat, TikTok eller YouTube.
Ver bevisst på korleis du kommuniserer. Det er viktig at bodskapen kjem tydeleg fram.
Bruk visuelle element og verkemiddel som treffer målgruppa, og som er relevante for den sosiale mediekanalen du har valt.
Målet er at innlegget skal setje søkjelys på saka og skape debatt.
Oppsummering
Gå saman i grupper og diskuter desse spørsmåla:
Kva for eit av innlegga dine har sterkast påverknadskraft? Lesarinnlegget eller innlegget du publiserte i sosiale medium? Kvifor?
Korleis påverkar du offentlegheita med desse innlegga?
Viktige samfunnsspørsmål blir debatterte i ulike kanalar kvar einaste dag. Kvifor er offentlegheita avhengig av eit mangfald av stemmer og eit mangfald av debattarenaer?
Relatert innhald
Media speler ei viktig rolle i ei velfungerande offentlegheit.