Mijjen jijnjh gåetieh

Mijjen jijnjh gåetieh

Saemien gielesne ij leah baakoe mij gaptja daaroen baakoem hjem. Mohte mijjen jïjnjh gåetieh gusnie sjïere jaepie-boelhki årroejibie.

Tjaktje.

Tjaktje-daelvien aalkoe.
Doen såemies aereden fahkajimh jih åadtjoejimh vuejnedh, jijsen-aajja lea daan jijjen vaadtsehtjamme. Iehkeden aerebi dan tjaebpies elmie goh biejjie luajhtede. Jih dallah goh biejjie tjaangeme, dle joe jueskebe dobti. Dan jueskie guktie almetje raaktan tjoevere vaadtsajidh vuartasjidh mejtie moerh gåetesne jih mejtie naan beassetje jih faadta-moeretjh.

Nov almetje maahta hojjestalledh juhkoe guarkoe joe dellie giesie jïh tjaktje-giesie vaaseme. Mohte guktie joem hov njaelkie aaj dobtoe gosse almetje daajra, aah dellie amma nagkh tjoevere vihth jeatjhlaakan aelkedh biejjide jih barkoem öörnedh.

Dovletje aejkiej, goh saemieh lin johtehtjeminie, dle fierhten jaepie-boelhken lin vihties årrome-sijjieh. Nimhtie dam ij leah mijjen naan vihties baakoe joekoen sæjjan, guktie dihte laedtiej baakoe hjem. Mijjen lij dïhte gåetie dihte hjem. Jih dejstie gåetijste lin jijnjh, Tjaktje-, daelvie-, gijre- jih giesie-gåetieh. Jih gellien aejkien soptsestin dovne vihties sijjiej jïh gåetiej bijre gusnie dle dej gaskeboelhki aaj lin årroeminie, guktie suehpedem jallh tjaktje-giesiem. Nimhtie sån dam aaj, saemien dajvine dah jijnjh Gierehtsjaevrieh. Gierehtsem daaroen eelkin gåhtjodh tjerris, jih nimhtie sån dam eelkin jiehtedh Kjerringvatn. Dagkerh nommh gaavna gaajhkem lehkiem, saemien dajvine, Nöörjesne jih Sveerjesne. Jih gosse vuartesje jih daajra guktie leah saemieh johtehtjamme, dle vuajna, ojhte dah sijjieh gåabph lin dle gijrege, bæjjesvåårti, båateme juhtien jïh dle gieriehtsidie åadtjoejin laehpedh.

Jih dejstie seamma Gierehtsjaevrie-bealijste dle tjaktjege vihth ryöjredin våålesvorti juhtedh. Desnie lij dle buvrie aaj, gusnie daelvie-vaarjoeh jih gaajhke jeatjah daelvie-daarpsnohke. Nimhtie mijjen almetjh dej beeli åadtjoejin abpe gåetiem jih gåetie-sijjiem, joekehth jaepieboelhki mietie sirtedh.

Mijjieh daaletje almetjh jis abpe jaepiem dennie seamma sijjesne jogrestibie. Nov dle aaj maaje fierhten jaepien, gåessie joem gåabph joem vuelkiejibie eejehten. Jïh dihte dan reaktoe dobtoe, åadtjodh sijjiem sirtedh.

Munnjien jis daan aejkien såajhta edtjem dle uvre daelie, tjaktje-daelvien aalkoen, åarjese våålesvåårti juhtedh. Gosse doh juhtijeledtieh leah dle moevseginie tjåanghkenadteminie, dle manne aaj jijtsen daaletje gæjsam, koffertem gaarhkeminie edtjem haalanidh jïh åarjese girtedh.

Jilhts aaj im edtjh manne daelviedovvedh, dle ånnetji seammalaakan dobtoe, guktie aervedem dej baaletje almetjidie dobti gosse lin dle gaarhkeminie, juhteman ryöjredeminie.

Daaletje almetje hov gidtjh maahta, gosse åtna giesie daebpene mijjen noerhtelaantine ååpsen åenehks sjædta, dle nöörie åarjene minnedh giesiem buarastehtedh gusnie dihte abpe jaepiem jogreste.

Jih jis almetje lea aelkieminie båarastovvedh, dle lea gujht hijven aaj åadtjodh biejjesne tjahkasjidh bæktahtalledh, guktie veaksahkåbpoe sjædta mijjen tjåetskemes daelviem tjirrehtidh.

Luste sjædta vuejnedh guktie almetjh åarjene jis naemhtie tjaktjege leah barkeminie. Dihte gie lij dle dam sijjen gielem maahteme, guktie åådtjeme soptsestalledh aaj. Guktie sån dobtoe laantese båetedh gusnie ij gåabpa gænnah mijjen daaroengielijste guarkah. Debpene dle daej noerhtelaanti laedtieh rovkijh aaj tjuerieh dabtedh guktie dobtoe gosse ij maehtieh guarkedh maam jienehke almetje jeahta, guktie mijjen båeries-almetjh leah tjoeveramme, goh idtjin daaroen guarkah.

Daelie sån leah amma daejnie laantine aaj guarkaminie man vihkele lea almetjasse ietniengielem åadtjodh lieredh. Plaerine vuejnibie guktie jijnjine tjieltine leah ietniengiele-lohkehtæjjide barkoeh vedtieminie, gieh edtjieh gaajhkide duejtie ammes almetji maanide.

Dan muhteste dle joekoen rovnege dobtoe daejredh aktene mijjen fylhkine ij enne fylhken skåvloeåejvie gænnah daejrieh, saemien jåarhkeskåvloe-learohken lea aaj reakta jïjtse ietniengielem åadtjodh lohkedh.

Vååjnoe ij leah almetjasse aelhkie, lïhkes almetjidie seamma boerehke årrodh guktie guesside.

Dellie vuajnam tjaktje-ledtieh joe haalanieh!

Lohkh Aannan bïjre daesnie: Jaahkenelkien Aanna - Anna Jacobsen