Fagstoff

Sjangere jallh medijume?

Mij sjangere jïh medijume? Dah joekehts? Snap-bïevnese sjangere? Tv-programme sjangere? Ijje, ij gærja gænnah akte sjangere. Men medijume lea dïrrege, maam mijjieh nuhtjebe gosse gaskesadtebe. Sjangere lea elliesvoete gusnie dovne medijume, sisvege jïh hammoe leah meatan.

Medijume

Medijume lea dïrrege maam mijjieh nuhtjebe gosse edtjebe gaskesadtedh. Jis edtjebe musihkem tjoejehtidh dellie tjoejehtahkh daarpesjibie. Men maehtebe tjoejehtahkem aaj nuhtjedh gelline sjangerinie. Vuesiehtimmien gaavhtan maehtebe gitaarem tjoejehtidh gosse edtjebe joekehth laavlomh laavlodh goh maana-laavlomh, pop-laavlomh, rock-laavlomh, jnv. Gosse tjaaleldh jïh njaalmeldh gaskesadtemem nuhtjebe, maehtebe aaj joekehth medijumh nuhtjedh.

Akte gærja maahta romaane jallh biografije årrodh. Men aktene gærjesne maahta gellie gurreme-bïevnesh årrodh. Gosse raadijovem goltelibie dellie maehtebe ovmessie programmh goltelidh goh musihke-programmh, gihtjeme-gaahtjemh, gihtjedimmieh, j.n.v. Jis bloggem tjaelebe dellie maehtebe biejjie-gærjam tjaeledh, men aaj fealadimmie-soptsesh jallh faageles digkiedimmieh.

Medijume hammoem baajnehte

Naan aejkien medijume stuvrie magkerem gaskeesadtemem gåarede nuhtjedh. Gosse mijjieh raadijovem veeljebe dellie ibie maehtieh guvvieh vuesiehtidh. Jis tv:em veeljebe, dellie ibie maehtieh jïjnjh teeksth meatan utnedh.

Læjhkan jis ibie teeksth utnieh, maehtebe saadtegh darjodh dovne raadijovisnie jïh tv:sne. Aajkoe lea seamma, men medijume baajnehte maam veeljebe meatan utnedh gosse programmem darjobe.

Maaj-lïerehtimmesne medijume aaj lïerehtimmiem baajnehte. Dellie geerve learoehkidie jïh lohkehtæjjide laavlodh jïh stååkedidh.

Rïektes baakoem nuhtjedh

Gosse soptsestibie dellie sïejhme mijjieh medijumem jïh sjangere-nommh pleentebe. Vuesiehtimmien gaavhtan akte nyöjtetje 6 jaepien båeries soptsesti, SMS-bïevnesem åådtjeme gusnie dan voelpen nomme jïh årrome-sijjie. Jeehti: Im SMS-bïevnesem tellefovnesne åådtjeme, men SMS-bïevnesem aktene paehpierisnie.

Nyöjtetje lij vaane bïevnesem tellefovnesne åadtjodh, men ij paehperem gusnie maam akt tjaaleme. Dan åvteste tuhtji hijven gosse SMS-bïevnesem utni gïetesne. Biejjieladtje gïele ij leah seammalaakan guktie faage-gïele. Gosse teekstigujmie barkebe saemiengïele-faagine, dellie tjoerebe daejredh mij medijume jïh mij sjangere.