Skip to content
Article

Logose

Gosse datne argumenterdh jïh dellie hijven logosem nuhtjedh. Nuhtjh logihke argumenth jïh faaktah.
Gærja jïh stueriedimmie-klaase. Guvvie.
Image: Marit M. Fjellheim / CC BY-SA 4.0

Jis edtjh giem akt jaehkiehtidh dellie maahtah faaktah jïh logihke argumenth nuhtjedh.

Mujhtieh!

  • Jis håaloje saakeles dellie aelhkebe satnem leajhtadidh

  • Nuhtjh argumenth mah mijjen jiermiem baajnehtieh

  • Nuhtjh faaktah aamhtesen/saaken bïjre

Gosse logos-appellem nuhtjh, dellie datne daajroem/maahtoem nuhtjh gosse tjïelkesth. Datne tjoerh aaj soptsestidh man åvteste jïh mij maahta heannadidh, dellie goltelæjjah maehtieh jiermiem jïh logihkem guarkedh.

Argumenth mejtie mijjieh nuhtjebe, edtjieh mijjen vuajnoem nænnoestidh. Daate lea «ræhpas argumentasjovne».

Gosse edtjh saakeles argumenth gaavnedh aamhtesen bïjre, dellie tjoerh dov argumenth vuarjasjidh. Argumenth saatnan? Dah leah buajhkoes? Maahtah argumentide nænnoestidh?

Buajhkoes/sjiehtele

Ussjedh, edtjh argumenteradidh, datne orre sygkelem daarpesjh. Gosse argumentem gaavneme, ij argumente daarpesjh buajhkoes mubpide årrodh. Vuesiehtimmien gaavhtan jis tjædtjan jïh aahtjan jeahtah: «Manne orre sygkelem daarpesjem juktie mov voelpe orre sygkelem åådtjeme.» Argumente nov sån vihkeles dutnjien, men ij dov tjædtjan jïh aahtjan.

Men jis jeahtah «Manne orre sygkelem daarpesjem juktie mov sygkele mårhkanamme.» Dellie daate argumente buerebe jïh veaksahkåbpoe goh dïhte voestes.

Nænnoesvoete

Dov argumenth byöroeh veaksehke årrodh. Datne tjoerh mujhtedh, tjoerh eensi argumenth utnedh juktie jaehkiehtidh. Jis dov lea bagkesimmie, dellie tjoerh argumenth utnedh mah viehkiehtieh bagkesimmiem nænnoestehtedh.

Mujhtieh!

Mah argumenth jïh bagkesimmieh vihkeles meatan utnedh?

  • Saatnan? (bagkesimmie saatnan?)

  • Vihkeles? (argumente buajhkoes?)

  • Nænnoes? (mij akt gååvnese maam maahtah dov bagkesimmiem nænnoestehtedh?)