Hopp til innhold

  1. Home
  2. Åarjelsaemien voestesgïeline BF jïh SRChevronRight
  3. Tjaaleldh govlesadtemeChevronRight
  4. Guktie tjaalegh viertiestidhChevronRight
SubjectMaterialFagstoff

Fagartikkel

Guktie tjaalegh viertiestidh

Daennie tjaalegisnie raerieh guktie datne edtjh göökte ovmessie tjaalegh viertiestidh. Gosse viertesteminie dellie edtjh hedtieh jïh joekehtsh gaavnedh tjaalegi gaskem.

Tjaalegh viertiestidh

Gosse datne edtjh göökte tjaalegh viertiestidh, dellie edtjh tjaalegi hedtieh jïh joekehtsh gaavnedh.

Gaavnh hedtieh jïh joekehtsh


Voestegh edtjh hedtieh gaavnedh. Ohtsedh mah seammalaakan gåabpegen tjaaleginie.

  • Seamma teema tjaaleginie?
  • Seamma viehkie-vierhtieh nuhtjesuvvieh tjaaleginie?
  • Tjaalegh seamma sjangerisnie?
  • Tjaalegh seamma tïjjeste?
  • Tjaelijh seamma dïjrem utnieh?

Dan mænngan edtjh dah joekehtsh gaavnedh:

  • Tjaalegh teemam joekehtslaakan gïetedieh? Jis numhtie guktie?
  • Mah viehkie-vierhtieh tjaelijh nuhtjieh? Akte tjaelije viehkie-vierhtieh nuhtjie mejtie ij dïhte mubpie tjaelije nuhtjh? Jis numhtie mah viehkie-vierhtieh?
  • Tjaalegh ovmessie sjangerinie? Jis numhtie mah joekehtsh dej gaskem?
  • Jis eah tjaalegh seamma tïjjesne, guktie datne dam vuajnah? Gaavnh vuesiehtimmieh tjaaleginie.
  • Jis ij dïjre seammalaakan, mij dellie joekehtse?

Viertiestimmie-vuekie

Gosse datne edtjh viertiestimmie-analysem tjaeledh. Dellie maahtah göökte vuekine dejnie barkedh. Veeljh aktem daejstie vuekijste.

Voestegh tjaalege A jïh dellie tjaalege B

  1. Tjaelieh aalkoem gusnie datne gåabpegi tjaalegi motijvem jïh teemam åehpiedahtah jïh dam maam vihkielommes. Mah seamma tjaaleginie.
  2. Åehpiedehtieh viehkie-vierhtieh åenehkslaakan, maam datne tjaalegisnie A gaavnih, jïh guktie viehkie-vierhtieh viehkiehtieh teemam bigkedh
  3. Åehpiedehtieh viehkie-vierhtieh åenehkslaakan, maam datne tjaalegisnie B gaavnih, jïh guktie viehkie-vierhtieh viehkiehtieh teemam bigkedh
  4. Guhkebe viertiestimmie-boelhke gusnie datne vuesiehtimmide tjaalegistie A jïh tjaalegistie B viertesth. (daennie biehkesne gellie boelhkh, mujhtieh meatan vaeltedh dam maam seammalaakan jïh mahte seammalaakan)
  5. Konklusjovne

Tsiehkeste tseahkan viertiestidh

  1. Tjaelieh aalkoem gusnie datne motijvem jïh teemam göökte tjaalegijstie åehpiedahtah. Tjaelieh aaj tjaalegi hedtiej bïjre.
  2. Tjaelieh aktem hedtien bïjre. Vaeltieh meatan vuesiehtimmieh gåabpegen tjaalegijstie, jïh guktie daate hedtie maahta mijjem tsevtsedh guktie mijjieh tjaalegem guarkebe.
  3. Tjaelieh akten orre hedtien bïjre. Vaeltieh meatan vuesiehtimmieh gåabpaegen tjaalegistie, jïh guktie daate hedtie maahta mijjem tsevtsedh guktie mijjieh tjaalegem guarkebe. (Datne maahtah gellie hedtiej bïjre tjaeledh men aellieh fer jïjnjh meatan vaeltieh)
  4. Tjaelieh buerkiestimmiem gusnie kontrasth tjaalegi gaskem vuesehth, mujhtieh vuesiehtimmieh meatan vaeltedh gåabpegen tjaalegijstie.
  5. Konklusjovne

Tsiehkeste tseahkan viertiestidh nov sån maahta gïerve årrodh. Men jis haarjenh, dellie gujht hijven gåarede. Vuekie datnem viehkehte mujhtedh guktie tjaalegidie viertiestidh abpe dov vaestiedassesne, jïh dellie dov vaestiedasse/tjaalege buerebe sjædta.

Læringsressurser

Tjaaleldh govlesadteme