Gellie-såarhts teeksth
Doh jeanatjommes lohkije-tjaalegh leah digkiedimmie-lahtesh, amma åenehks argumentereles teeksth aktine tjïelke veanhtojne, man åssjele lea lohkijem jaehkiehtidh. Men maehtebe aaj teeksth tjaeledh mah uvtemes edtjieh bievnedh:
Vuesiehtimmien gaavhtan, Saemien Sijte maahta akten prosjekten bïjre bievnedh, jallh akte privaate almetje maahta akten konserten bïjre tjaeledh mesnie satne orreme.
Ajve akten aamhtesen bïjre
Ij leah naan byjjes njoelkedassh guktie akte lohkije-tjaalege edtja vååjnedh, men jis sïjhth gellie lohkijh jaksedh, dellie dov tjaalege byöroe aktelaaketje årrodh. Tjaelieh dan åvteste åenehks jïh tjyölkehke, jïh ajve akten aamhtesen bïjre.
Aktene lohkije-tjaalegisnie datne dov persovneles vuajnojne båatah, desnie dov åssjaldahkh jïh domtesh tjaalah. Dov lea luhpie aatide ånnetji gïeregen nïlle bïejedh, jïh maahtah maaje ånnetji striengkies årrodh jis tuhtjh daerpies. Ih byörh almetjh håasedh, jïh tjoerh ajve rïektesem tjaeledh.
Nuhtjh gïeleldh vierhkie-vierhtieh
Lohkije-tjaalege nedtesne jallh paehpere-plaeresne tjuara lohkijen tsåatskelesvoeten bïjre gaahtjedh jïjnjh jeatjah teekstigujmie. Dan åvteste vihkeles datne buektehth lohkijen ïedtjem feengkedh guktie sæjhta dam lohkedh. Nuhtjh gïelem juktie domtesh gåaskodh, jïh tjaelieh naemhtie guktie lohkije datnem, tjaelijem laajhta.