Mosel

Når regionen har tre namn, Mosel-Saar-Ruwer, kjem det av at han har namn etter tre ulike elvar. Mosel er den største og den som har hatt mest å seie. Saar og Ruwer er sideelvar som renn inn i Mosel.

Vidare er det den midtarste delen av Mosel, rundt Bernkastel Kues, som blir rekna som den beste. Han blir gjerne samanlikna med Rheingau.

Spesielt høgt verdsett blir vin frå vinmarka Doktor som stig bratt opp frå Bernkastel, men det finst kjende vinmarker og ypparlege vinar langs heile elva.

Kjende vinbyar

• Zell med Schwarze Katz
• Reil med vom Heissen stein
• Zeltingen med Sonnenuhr
• Piesporter med Michelsberg
• Trittenheim med Apotheke
• Klüsserath med St. Michael

Alkoholsvak og frisk

Moselvinane er gjerne alkoholsvake (9–10 prosent), men friske og elegante med god bouquet. Dette gjeld særleg dei som er laga på Riesling-drua, men gode vinar blir òg laga av Müller-Thurgau, Elbing og Kerner. I Moseldalen blir det gjerne brukt grøne flasker. Mesteparten av vinen er halvtørr, men det finst òg mange søtlege (lieblich) og søte. Det blir dessutan etter kvart produsert ein del brukande tørre.