Côtes du Rhône

Området Côtes du Rhône strekkjer seg frå Vienne i nord, langs elva Rhône 200 kilometer til Avignon i sør. Vinane herfrå utgjer den nest største gruppa av fransk kvalitetsvin i dag.

Klassifisering

Klassifiseringa av vinane herfrå liknar klassifiseringa som blir nytta i Beaujolais med Les Crus des Côtes du Rhône som dei beste, Côtes du Rhône villages som dei nest beste og Côtes du Rhône nedst på rangstigen. I tillegg til dei tre hovudappellasjonane har distriktet fleire AOC-/AOP-ar og VDQS-ar, som òg blir grupperte som Rhône-vin sjølv om dei ikkje går direkte inn i appellasjonssystemet til Côtes du Rhônes.

Distrikta i Côtes du Rhône

Dei viktigaste vindistrikta i Côtes du Rhône er frå nord:

Côte-Rôtie
Hermitage
Crozes-Hermitage

Vinmarkene ligg ofte i bratte skråningar, og avkastninga er lita. Distriktet er prega av innlandsklima med varme somrar og kalde vintrar. Vidare sørover kjem eit 30 kilometer langt stykke der det ikkje blir dyrka druer. Ved byen Montélimar startar druedyrkinga igjen. Der opnar landskapet seg meir og har middelhavsklima. Der er det enklare å dyrke druer, og avkastninga er større. Kjende distrikt her er Châteauneuf-du-Pape, Tavel og Beaume de Venise.

Côte-Rôtie

Côte-Rôtie (den steikte åssida) er ofte rekna som den fremste vinen i Rhône. Vinane er lagringsdyktige, kraftige og bouquetrike og har ein karakter av fiolar, pepar, trøflar og lakris. Vinane blir stort sett laga av syrah-drua. Nokre gonger blir vinen blanda med vin frå ein del grøne druer for å få ein mildare karakter. Vinane går gjennom ei forholdsvis lang fatlagring, opptil 3–4 år.

Hermitage og Crozes-Hermitage

Områda Hermitage og Crozes-Hermitage ligg midt mellom Nordpolen og ekvator på 45° nordleg breidd, som er ei ideell plassering. Dei klimatiske forholda er òg dei beste. I tillegg til mykje sol er det passe med regn, og temperaturen er veleigna takka vere at vinmarkene ligg 250–300 meter over havet. Raudvinsdrua er syrah, og vinane har mykje til felles med Côte-Rôtie-vinane. Også her hender det at det blir blanda i opptil 15 prosent grøne druer. Som unge er vinane fruktige, eldre vin har preg av mandlar og nøtter.

Châteauneuf-du-Pape

Namnet Châteauneuf-du-Pape betyr "det nye slottet til paven". Området ligg nord for byen Avignon og fekk namnet sitt etter at pave Clemens 5. slo seg ned i Avignon på slutten av det 14. hundreåret og bygde seg ein sommarresidens på høgdedraget som seinare fekk dette namnet. Området har dei best kjende vinane i Rhône. Jordsmonnet er spesielt. Runde, glatte, store steinar ligg i eit to meter tjukt lag i nokre av vinmarkene. Steinane både reflekterer solvarmen og magasinerer han og gir varme utover natta. Dette fører til eit høgt sukkerinnhald, noko som igjen fører til høg alkoholrikdom (14–14,5 prosent alkohol). Vinlovene i Châteauneuf-du-Pape tillèt at ein nyttar opptil 13 druesortar. Den viktigaste drua er grenage, som gjer vinen blaut, mens syrah gir ein kraftig, smaksrik karakter.

Raude vinar frå Côtes du Rhône eignar seg godt til kraftige og feite kjøttrettar (svineribbe) og smaksrike viltrettar.

Tavel

Området Tavel ligg heilt sør i Rhône, vest for Avignon. Det blir berre produsert rosévin av grenage-drua i Tavel. Vinen blir ofte rekna for å vere den beste rosévinen og er av dei få rosévinane som kan lagrast. Vinen er tørr med fin fastleik, fylde og eleganse.

Denne rosévinen eignar seg godt til kaldbuffear og til frikassé og sautear av lyst kjøtt og fjørfe.

Beaume de Venise

Distriktet Beaume de Venise lagar ein ypparleg muskatellvin laga etter portvinsmetoden. Druesorten er muscat de frontignan. Vinen har ein karakter av såkalla julerosiner. Vinen eignar seg godt til dessertar laga av tørka frukt og til puddingar (diplomatpudding).

Sida har flytta, men du kan finne den her: