Hopp til innhald

  1. Home
  2. Kokk- og servitørfag Vg2ChevronRight
  3. Råvarer og produksjonChevronRight
  4. EggChevronRight
  5. EggChevronRight
SubjectMaterialFagstoff

Fagartikkel

Egg

Her skal vi sjå på dei forskjellige hovudmåtane å lage til egg på.

bilde av en kollasj med  eggeretter

Eggerøre

Eggerøre med gressløk. Foto.
Eggerøre med gressløk

Pisk saman egg, fløyte, salt og eventuelt garnityr. Steik på svak varme mens du rører forsiktig. Eggerøra skal ha ein fuktig konsistens når ho er ferdig.

Eggtimbalar

Smør runde, høge porsjonsformer av aluminium godt. Ha i garnityret som skal serverast, med i forma. Legg eitt egg i kvar form og posjer det i vassbad i cirka 8 minutt. Kvelv egget ut av forma og legg det fint på fatet eventuelt med garnityr og saus.

Fritert egg

Bruk helst friske egg. Knus først egget forsiktig i ein kopp. Ha egget i frityren. Samle kviten rundt plomma med to tresleiver. Server eventuelt med garnityr og saus.

Kaldt hardkokt egg

Hardkokt egg delt i to. Foto.
Hardkokt egg

Avkjøl kokte egg og reins dei for skal. Egga skal serverast kalde, anten med fyll eller med forskjellig garnityr alt etter kva oppskrifta krev.

Kokottegg

Smør låge porsjonsformer i porselen godt. Ha eitt egg i kvar form og posjer i vassbad i omn i cirka 4 minutt. Server egget med forskjellige garnityr og sausar etter kva oppskrifta krev.

Kokt egg

Legg egga i ei nettingkorg og set henne oppi kjelen når vatnet koker. Når koketida er slutt, ta opp korga og kjøl henne ned i kaldt vatn.

Blautkokt egg: 3–5 minutt
Hardkokt egg: 8–10 minutt

Molletegg

Kok egget i 6–7 minutt. Reins det for skal og varm det raskt opp igjen i varmt vatn med salt. Server egget med forskjellige garnityr og sausar etter kva oppskrifta krev.

Omelett

Omelett. Foto.
Omelett naturell

Omelett blir laga av egg, vatn (eller fløyte), smaksstoff og garnityr. Han blir vanlegvis steikt i porsjonsomelettar (à la carte). Omeletten skal steikjast i panne mens du rører frå botnen. Ved slutten av steikinga arbeider vi omeletten over til den eine sida av panna og formar han som ein halvmåne. Samtidig blir undersida steikt gyllen. Omeletten skal kvelvast på eit fat eller ein tallerken.

Omelettar blir delte inn i:

  • omelett med frest garnityr blanda i massen
  • omelett fylt med garnityr
  • ferdigsteikt omelett som skal fyllast
  • flat omelett

Omelett med frest garnityr blanda i massen

Omelett med laks. Foto.
Omelett med laks

Garnityret skal fresast før ein har i omelettrøra.

Omelett fylt med garnityr

Legg garnityret i midten før du brettar omeletten saman til ein halvmåne.

Ferdigsteikt omelett som skal fyllast

Legg omeletten på eit fat eller ein tallerken og snitt han på baksida. Fyll han så med garnityr, for eksempel soppstuing.

Flat omelett

Fres garnityr i steikjepanne. Hell så omelettrøra over og steik ferdig på svak varme anten i panna eller i steikjeomn.

Posjert egg

Knus eit egg i ein kopp og legg det forsiktig oppi kokande posjeringsvatn (vatn, eddik og salt). Samle kviten rundt plomma med ein gaffel og posjer i cirka 2–3 minutt. Ta opp egget og legg det i kaldt vatn. Lag til egget og server det med forskjellige garnityr og sausar etter kva oppskrifta krev.

Speilegg

Speilegg på brødskive med tomat og agurk. Foto
Speilegg, tomat og agurk

Egget bør vere friskt, og det skal steikjast i klara smør eller margarin i ei steikjepanne. Ikkje la feittet bli brunt, og ikkje steik på for sterk varme. Speilegget kan serverast med forskjellige garnityr etter kva oppskrifta krev.

Garnityr: tilbehøyret til ein rett
Posjere: å koke ved ein temperatur under 100 °C

Læringsressursar

Egg

SubjectEmne

Fagstoff

SubjectEmne

Oppgaver og aktiviteter