Hopp til innhald

  1. Home
  2. Restaurant- og matfag Vg1ChevronRight
  3. RåvarerChevronRight
  4. FjørfeChevronRight
SubjectMaterialFagstoff

Fagartikkel

Kalkun

Kalkun er det aller magraste kjøtslaget vårt. Brystfileten inneheld berre 0,5 prosent feitt. Den milde og fine smaken på kalkun gjer at vi kan kombinere han med svært mange smaksretningar når det gjeld krydder, saus, stuffing og anna tilbehøyr. Kalkunen er ein retteleg festfugl som kan serverast heil.

Kalkun, heilstekt kalkun og kalkunpålegg. Kolasj.

Vi kan like gjerne servere han kald som varm, og kalkunen passar derfor like godt på eit kaldtbord sommarstid som til julemiddag. Det er ikkje først og fremst på julaftan at kalkunen blir sett på bordet i kvar ein heim. Det skjer først i den selskapelege romjula for å toppe seg på nyttårsaftan.

Vareutval

Kalkun finst i vektklassar frå 3 til 12 kg. Det er likevel 5–7 kg som er mest vanleg. Større kalkunar gir meir kjøt i høve til bein fordi beinvekta på små og store kalkunar er omtrent lik. Så langt har kalkunen stort sett blitt selt frosen, men det blir stadig meir vanleg med fersk kalkun. Produkt av kalkun som filetar, biffar, pålegg og pølser kjem det stadig meir av på marknaden.

Tine frosen kalkun

For å minske væsketapet bør vi tine kalkunen i kjøleskap eller på ein kjølig stad. Det tek om lag 2 døgn å tine ein middels stor kalkun. La kalkunen vere dekt til under tining og fjern innmatposen så snart kalkunen er tint.

Dele opp heil, rå kalkun

Press låret på kalkunen utover og snitt i skinnet. Skjer over i leddfestet for å løyse låret frå resten av kalkunen. Del eventuelt låret i to på same måten som kyllinglår. Skjer eit snitt langs brystbeinet og ned ved halsen langs "ønskjebeinet". Skjer ut brystfileten ved å la kniven følgje skroget frå toppen og ned mot vengefestet. Løys fileten ved å skjere eit snitt på utsida, frå lårfestet mot vengefestet. Gjer det same på motsett side. Vengene løyser du ved å dele dei over i leddet.

Trygg mat

Vi har, saman med Sverige og Finland, truleg den tryggaste kyllingen og kalkunen i verda. Kaldt klima, små gardsbruk og gode kontrollrutinar medverkar til at vi aldri har hatt eit einaste sjukdomstilfelle av salmonella frå norsk kylling eller norsk kalkun. Det er ein stor verdi å kunne ete utan risiko for å bli sjuk av maten! Ein viktig skilnad å vere klar over, etter kvart som vi truleg får meir import av kvitt kjøt frå land med dårlegare mattryggleik.

Historie

Det var indianarane i Mexico som først alte opp kalkun. Då dei spanske conquistadorane invaderte Mexico på 1500-talet blei dei så imponerte over denne fuglen, som smakte så godt, at dei tok med seg kalkunar attende til Spania. Etter kvart spreidde kalkunen seg òg til andre europeiske land. Det er først i dei seinare år at det har blitt vanleg å ete kalkun her i landet, og då i hovudsak til jul og nyttår.

Thanksgiving Day

Bilde av et thanksgiving kort

Historia om den amerikanske Thanksgiving-feiringa starta i 1621. Dei engelske pilegrimane som hausten før hadde kome til den nye verda med skipet Mayflower, hadde hatt ein svært hard vinter. Dei lærte likevel å dyrke jorda av vennlegsinna indianarar. Pilegrimane syntest dei hadde mykje å feire, og inviterte indianarane til ein stor takkefest. Thanksgiving Day er i dag ei viktig høgtid i USA og blir feira fjerde torsdag i november. Maisbrødstuffing, kokte grønsaker, marshmallowgratinerte søtpoteter, potetmos og tranebærsyltetøy er viktig tilbehøyr. Skikken med å feire hausttakkefest er noko kalkunelskarar prøver å gjere til ein tradisjon også her i Noreg.

Læringsressursar

Fjørfe

SubjectEmne

Fagstoff

SubjectEmne

Oppgaver og aktiviteter