1. Home
  2. Restaurant- og matfag Vg1ChevronRight
  3. RåvarerChevronRight
  4. FjørfeChevronRight
  5. KyllingChevronRight
SubjectMaterialFagstoff

Fagartikkel

Kylling

På matbord over heile verda finn vi kylling og kyllingrettar. Kylling er tillaten i alle kulturar og religionar. Kyllingen, som har ein mild eigensmak, passar til alle typer krydder, frukt og grønsaker, og kan kombinerast med fisk og sjømat så vel som andre sortar kjøt.

Cajunkrydret helstekt kylling med bakte søtpoteter og grønn chili-vinaigrette. Foto.

Crossover og fusjonskjøkken er omgrep som karakteriserer noko av dette. Her kombinerer ein mattradisjonar frå ulike verdsdelar.

Kyllingforbruk

Kyllingforbruket i Noreg har vore i sterk vekst dei siste åra. Grunnen til dette er mellom anna større utval i daglegvareforretningane av fersk kylling, både heil og i stykningsdelar. Dessutan har vi etter kvart blitt flinkare til å prøve nye og «frammande» smakar og let oss inspirere til å lage spennande kyllingrettar frå heile verda.

Bilete av tre kyllingrettar
At kylling blir eten over heile verda, er desse rettane gode døme på: Coq au vin frå Frankrike, paella frå Spania og tandoorikylling frå India.

Det magraste kjøtet

Kvitt kjøt er det aller magraste kjøtet. Feittet er ikkje isprengt i kjøtet, men sit like under skinnet og i buken på kylling og kalkun. Det vesle feittet som finst, har ein høg prosentdel umetta feitt i høve til metta feitt. Kyllingfilet inneheld berre 1,1 prosent feitt og kalkunfilet 0,5 prosent feitt. Fokusering på helse og sunn mat har medverka til at folk i stadig større grad vel kvitt kjøt.

Kor mykje veg kyllingen?

Kylling finst i mange vektklassar. Rå kylling som blir brukt til grilling i butikk veg i hovudsak 750–1000 g. Heil kylling som blir selt rå, veg rundt 1 kg, men finst i vektklassar opptil om lag 3,5 kg. Dei største kyllingane blir i hovudsak selde til gourmetrestaurantar, men ein kan òg få kjøpt dei i enkelte delikatesseforretningar.

Rekne porsjonar

Kor mykje kylling vi skal rekne per porsjon kjem an på om vi vel små eller store kyllingar, og kva vi serverer ved sidan av kyllingen. Sjølv om små og store kyllingar har den same kvaliteten, er det meir kjøt i høve til bein på dei store. Vel du små kyllingar, til dømes på 600 g, bør du rekne ein halv til ein heil kylling per person, medan ein stor kylling på 1,5 kg kan vere tilstrekkeleg til 4–5 personar.

Oppdeling

Det er ikkje vanskeleg å dele ein kylling, men for at resultatet skal bli best mogeleg, bør du ha ein skarp, spiss kniv. Ei god saks gjer òg nytten. Det er ikkje nødvendig å kjøpe inn fuglesaks.

Stykningsdeler av kylling. Foto.

Kylling delt i to: Skjer ned langs brystbeinet, brett godt ut og skjer langs ryggbeinet på begge sider.

Kylling delt i fire: Del der det er naturleg mellom bryst og lår.

Kylling delt i åtte: Låra deler du best ved å skjere i leddet. Bøy litt på beinet, så finn du leddet lett. Bryststykket deler du berre over på midten.

Utskjering av lår: Press låret ut frå skroget til leddet knekk. Del over leddet og låret er laust.

Utskjering av brystfilet: Ta utgangspunkt i ein heil, rå kylling. Skjer eit snitt langs brystbeinet og la kniven følgje skroget ned mot venga. Lag eit snitt som går over vengebeinet, slik at brystfileten lett kan skjerast ifrå. Fjern skinnet. Dersom oppskrifta er «kyllingbryst», let du skinn og vengebein sitje på.

Læringsressursar

Fjørfe

SubjectEmne

Fagstoff

SubjectEmne

Oppgaver og aktiviteter