Gállok – kampen om sameland

Gállok – kampen om sameland er ein svensk dokumentarfilm frå 2019 som er laga av filmskaparen Truls Andersen.

Filmen viser kva konsekvensar utbygging av gruver kan ha for natur og lokalsamfunn i Sverige og Sápmi.

Tor Lundberg og familien bur i Gállok i Nord-Sverige. Tor og familien kjøper aldri fisk, kjøt eller bær i butikken. Dei plukkar bæra sjølve, fiskar og går på jakt.

No ønskjer eit gruveselskap å opne ei ny jernmalmgruve i nærleiken, i eit område med urørt natur.

Samane har reinen sin i dette området, og gruvedrift vil vere katastrofalt for reindrifta. Gruvedrifta utgjer òg ein fare for dyreliv og fisk i området, som vil bli truga av forureininga frå gruvedrifta.

Gállok er ein stad som har vore prega av fråflytting dei siste åra. Mange arbeidsplassar har gått tapt. Nokre i bygda ser på gruvedrifta som ei stor moglegheit for å skape nye arbeidsplassar for folk i Gállok.

Miljøaktivistar protesterer mot gruvedrifta, og gamle vener hamnar i konflikt med kvarandre.