I stasjonære datamaskinar bruker vi hovudsakleg ATX-kontaktane som er omtalte i denne artikkelen. I berbare datamaskinar, små stasjonære datamaskinar og serverar bruker vi ofte andre kontaktar.
Kontaktane har ein kombinasjon av firkanta og halvrunde pinnar. Dette gjer at det berre skal vere mogleg å setje inn kontaktane i riktig retning. Dei er ofte òg merkte med namn.
24-pinnars kontakt (20 + 4) for hovudkort
Hovudkortet bruker mykje av straumen i datamaskinen. Det leverer òg straum vidare til einingar som er tilkopla via PCIe og USB. Hovudkortet er derfor kopla til straumforsyninga med ein 24-pinnars kontakt og vanlegvis òg ein ekstrakontakt (EPS12V) som leverer 12 volt ekstra og har 8 pinnar.
Ein 24-pinnars kontakt leverer fleire straumspenningar (3,3 volt, 5 volt og 12 volt). 4 av pinnane blir brukte til naudsynt kommunikasjon mellom hovudkortet og straumforsyninga.
Gamle hovudkort brukte 20-pinnars kontakt i staden for 24-pinnars kontakt til straumforsyning. På enkelte straumforsyningar er det mogleg å dele ein kontakt med 24 pinnar slik at du kan bruke han som 20-pinnars kontakt.
8-pinnars kontakt (4 + 4) for hovudkort (EPS12V)
Hovudkortet i stasjonære datamaskinar krev ofte ekstra straum frå straumforsyninga. Til dette har vi EPS12V-kontakten. Det er ein 8-pinnars kontakt som leverer 12 volt straum. Denne kontakten kan ofte delast for å fungere med eldre hovudkort der ekstrakontakten for straum har 4 pinnar.
Når ein byggjer si eiga datamaskin, er det ein vanleg feil å gløyme å kople til denne kontakten. Men utan denne vil ikkje datamaskinen starte.
4-pinnars Molex-kontakt
Dette er ein gammal kontakttype som blei brukt for å levere 12 volt og 5 volt til harddiskar, DVD-spelarar og anna utstyr inne i datamaskinen.
4-pinnars Molex er i dag lite brukt, men dei fleste straumforsyningar blir framleis leverte med nokre av desse kontaktane. SATA 15-pinnars straumkontakt er i ferd med å ta over for denne kontakten.
SATA 15-pinnars straumkontakt
Denne kontakttypen blir brukt for å levere 12 volt og 5 volt til harddiskar og DVD-spelarar. Han har i stor grad teke over for 4-pinnars Molex, sidan han er mykje smalare og dermed passar til tynne SSD-ar og harddiskar i berbare datamaskinar.
8-pinnars (6 + 2) PCIe-straumkontakt
Kraftige skjermkort treng ofte mykje meir straum enn det PCI Express-kontakten på hovudkortet kan levere. Då blir det brukt ein 8-pinnars PCIe-kontakt. Denne leverer 12 volt straum.
Ofte kan ein slik 8-pinnars kontakt delast slik at ein får ein 6-pinnars og ein 2-pinnars kontakt. Kontakten med 6 pinnar kan då brukast på enkelte svakare skjermkort eller i kombinasjon med ein 8-pinnars kontakt på dei kraftigaste skjermkorta.