Vi omgir oss med små og store datamaskinar og system det meste av tida. Vi er avhengige av mange av desse for at kvardagen og samfunnet rundt oss skal fungere. Men korleis fungerer denne teknologien?

Ei moderne datamaskin er avansert, med samansett teknologi som for dei fleste er vanskeleg å forstå korleis fungerer. Dei fleste nøyer seg med å berre akseptere at teknologien er der og fungerer. Som arbeider innan media og IT treng du litt meir djupne for å kunne gjere jobben din på ein god måte.

Datamaskinar kjem i mange variantar og utformingar. For vanlege brukarar er det mest vanleg med berbar datamaskin. Uavhengig av utforming har maskinane dei same hovudkomponentane. Kjennskap til dei gjer det lettare å forstå teknologien og gi grunnlag for å feilsøke og reparere.