Youtubarar og videoblogging
YouTube er den største nettstaden i verda for opplasting, vising og deling av videoklipp, og det er derfor ein viktig arena for mange videobloggarar. I ein videoblogg, òg kalla vlogg, er levande bilete hovuduttrykket, i motsetning til vanlege bloggar der ein bruker tekst og bilete. Ein aktør blir gjerne omtalt som ein vloggar.
Tenk over
Følgjer du nokon videobloggarar? Kva for nokre norske og utanlandske videobloggarar kjenner du til? Trur du at du er i målgruppa deira? Kvifor eller kvifor ikkje? Er personane kjende frå før, eller har dei vorte kjende på grunn av vlogginga?
Når du videobloggar, handlar det om å vere personleg og nær. Du fortel ofte frå ditt eige liv, og deler tankar, interesser eller meiningar. Slikt innhald engasjerer fansen og følgjarane dine. Motivasjonen til dei uprofesjonelle vloggarane startar gjerne med at dei brenn for noko og følgjer hjartet sitt. Mange av desse vloggarane treffer målgruppa si godt på YouTube.
Innanfor underhaldning kan videoblogging brukast som eit profileringsverktøy. I dag kan til dømes ein musikkartist bruke YouTube for å nå fansen sin på ein meir personleg måte. Videoblogging blir altså brukt av både amatørar og profesjonelle for å nå fram med ein bodskap.