Budsjett som eit framtidsrekneskap
Dei fleste bedriftene har behov for å planleggje. Ein av dei viktigaste måtane å planleggje på er å setje opp eit budsjett for neste år. Eit budsjett er eit oversyn som viser korleis vi håpar og trur rekneskapen vil sjå ut neste år.
La oss seie at det gjekk akkurat slik vi håpa då vi sette opp budsjettet for neste år. Budsjettet vårt ville då vore heilt lik den rekneskapen vi førte månad for månad.
Dette vil nok aldri skje. Men vi forstår at budsjettet er ein slags framtidsrekneskap. Store bedrifter utarbeider budsjettet for neste år i perioden august–oktober, mindre bedrifter i perioden november–desember.
For å kunne samanlikne budsjettet med korleis det faktisk går månad for månad, må vi budsjettere på alle dei kontoane vi normalt fører på.
Budsjettkontroll
Ei jamføring mellom budsjett og rekneskap kallar vi ein budsjettkontroll. Ein slik analyse bør gjennomførast kvar månad. Berre på den måten kan vi setje i verk tiltak for å rette opp situasjonen. Finn vi ikkje avvika før mot slutten av året, har vi liten eller ingen sjanse til å kunne rette opp der vi kom skeivt ut.
Det finst fleire typar budsjett, men det vanlegaste og mest nødvendige er resultatbudsjettet. Når året er omme, kan vi setje opp ei samanlikning mellom resultatbudsjettet og den faktiske resultatrekneskapen for heile året og få fram dei totale avvika. Den analysen hjelper oss til å planleggje og budsjettere for neste år.
Eit eksempel
Budsjettet er eit av de viktigaste verktøya til å kunne få ei god økonomistyring av bedrifta. Nedanfor gir vi eit eksempel på ein budsjettkontroll.
- Korleis har planen slått til for denne bedrifta?
Kan du finne ut korleis vi har rekna ut avvika i prosent?
Kalkulasjon | Rekneskap i kroner | Budsjett i kroner | Avvik i krone | Avvik i prosent |
|---|---|---|---|---|
Varesal | 50 000 | 45 000 | 5 000 | 11,1 % |
Varekostnader | 30 000 | 26 000 | -4 000 | -15,4 % |
Bruttoforteneste | 20 000 | 19 000 | 1 000 | 5,3 % |
Lønn | 8 000 | 7 800 | -200 | -2,6 % |
Arbeidsgivaravgift | 1 120 | 1 092 | -28 | -2,6 % |
Straumkostnader | 1 000 | 1 200 | +200 | +16,7 % |
Husleige | 2 000 | 2 050 | +50 | +2,4 % |
Avskrivingar | 1 200 | 1 400 | +200 | +14,3 % |
Rentekostnader | 1 000 | 800 | -200 | -25,0 % |
Sum indirekte kostnader | 14 320 | 14 342 | +22 | +0,2 % |
Resultat | 5 680 | 4 658 | 1 022 | 21,9 % |