Kva er rett, og kva er gale?
Kva er gode og dårlege handlingar? Dette er sentrale etiske spørsmål.
Etikken gir oss rammer til å tenkje gjennom kva vi legg vekt på når vi skal gjennomføre val. Kva er viktigast: handlinga eller resultatet av handlinga?
Verdiar
Verdiar kan handle om pengar og materielle ting, fridom, tryggleik, helse, tilhøyrsel, menneskeverd og vilkår for sjølvrealisering.
Når vi står overfor konkrete val, verkar verdiane som ei rettesnor for å finne ut kva alternativ som er best. Det gjeld anten det dreier seg om dei store spørsmåla i tilværet eller små, kvardagslege spørsmål.
Tenk over
Kva for verdiar er viktige for deg? Ta utgangspunkt i punkta nedanfor og reflekter over kva verdier som er aller viktigast for deg. Diskuter gjerne i grupper.
- vere ansvarleg
- ha pengar og materielle ting
- ikkje jukse
- ikkje diskriminere menneske
- vere hjelpsam
- vere lovlydig
- lytte til andre menneske
- vere omtenksam
- vere pliktoppfyllande
- vere rettvis
- vere trufast mot venner
- vere ærleg
Kvardagssituasjonar
Vi kan ikkje unngå å komme opp i situasjonar som er etisk utfordrande: juks på skulen, rettferdig handel, kjøp og sal av piratkopiar, sosial dumping, varsling om ulovlege tilhøve.
Døme
I lagidrett er det dommaren som dømmer. Ein norsk landslagsspelar i fotball fekk for nokre år sidan godkjent ei skåring på klubblaget sitt, trass i at ballen ikkje var i mål. Fotballspelaren gjekk til dommaren og ba han annullere skåringa. Målet blei annullert.